«ԱրմենՏել»-ը Մեծ հայրենական պատերազմի վետերաններին մինչեւ տարեվերջ ազատել է բաժանորդային վարձից

Երեւան/Մեդիամաքս/. «ԱրմենՏել» ընկերությունը (Beeline ապրանքանիշ) Մեծ հայրենական պատերազմի վետերաններին եւ նրանց հավասարեցված անձանց մինչեւ 2010թ. ավարտը ազատել է ֆիքսված հեռախոսակապի բաժանորդային վարձի վճարումից: 

Մեծ հայրենական պատերազմի մասնակիցները, ովքեր հաշվառված են ՀՀ աշխատանքի եւ սոցիալական ապահովության նախարարությունում, ավտոմատ կերպով ազատվում են «ԱրմենՏել»-ի ֆիքսված հեռախոսակապի օգտագործման դիմաց բաժանորդային վճարից ըստ բնակության վայրի` անկախ նրանից, թե ընտանիքի անդամներից ում անունով է գրանցված հեռախոսահամարը:

Մեծ հայրենական պատերազմի այն մասնակիցները, ովքեր ներառված չեն նախարարության ցուցակում, ներկայացնելով իրենց վետերանի գրքույկը կամ անձնագիրը Beeline-ի վաճառքի կամ սպասարկման ցանկացած գրասենյակում, նույնպես կազատվեն վետերանի գրանցման վայրի ֆիքսված հեռախոսակապի վարձի վճարումից: