Երեւան /Մեդիամաքս/. “Ձեռնարկությունների ինկուբատոր” հիմնադրամը, ՀՀ էկոնոմիկայի նախարարությունը եւ Microsoft ընկերության հայաստանյան ներկայացուցչությունը այսօր հայտարարել են հերթական “Ծրագրավորման բաց մրցույթի” անցկացման մասին:
Ինչպես այսօր կայացած մամլո ասուլիսում հայտնել է հիմնադրամի տնօրեն Բագրատ Ենգիբարյանը, մրցույթին կարող են մասնակցել մինչեւ 30 տարեկան մասնագետները, ովքեր տիրապետում են ծրագրավորման C++ լեզվին:
Մրցույթի մասնակցության հայտերն ընդունվում են մինչեւ նոյեմբերի 16-ը aorc@eif.am էլեկտրոնային հասցեով:
Մրցույթը կանցնի երկու փուլով` անհատական եւ թիմային: Անհատական մրցույթի հաղթողները հնարավորություն կունենան Ծաղկաձորում մասնակցել Microsoft ընկերության կազմակերպած “Ուսումնական ճամբարին”:
Թիմային մրցությունը կկայանա նոյեմբերի 29-ին: Անհատական եւ թիմային փուլերի առաջին երեք տեղերը զբաղեցրած մասնակիցները կստանան դրամական խոշոր մրցանակներ:
