Գյումրիի տեխնոպարկի առաջին հնարավորությունները կներկայացվեն Digitec Expo-ում

Երեւան /Մեդիամաքս/. Գյումրիի տեխնոպարկի առաջին հնարավորությունները կներկայացվեն Digitec Expo 2009 ամենամյա ցուցահանդեսում, որը տեղի կունենա Երեւանում հոկտեմբերի 2-4-ը:

Ինչպես հաղորդում է ՄԵԴԻԱՄԱՔՍ-ը, ՀՀ Տեղեկատվական տեխնոլոգիաների ձեռնարկությունների միության (UITE) գործադիր տնօրեն Կարեն Վարդանյանն այսօր ասել է, որ ցուցահանդեսում կներկայացվի Երեւանի եւ Գյումրիի միջեւ հեռակա բուժսպասարկումը: Digitec Expo 2009 ցուցասրահում ներկա կլինեն բժիշկներ, որոնց օն-լայն ռեժիմով կցուցադրվի Գյումրիում գտնվող հաճախորդի սոնոգրաֆիան:

Ցուցահանդեսին կմասնակցեն նաեւ նորաստեղծ ընկերություններ, որոնք կցուցադրեն իրենց նախագծերը ֆինանսավորում ներգրավելու ակնկալիքով, ինչպես նաեւ պետական կառույցներ, որոնք կներկայացնեն իրենց ձեռքբերումներն էլեկտրոնային կառավարման ներդրման ոլորտում:

Ցուցահանդեսի շրջանակներում կկազմակերպվեն մի շարք սեմինարներ եւ ArmRobotics առաջնությունը:

Ucom ինտերնետային պրովայդերի գլխավոր տնօրեն Հայկ Եսայանը հայտնել է, որ ցուցահանդեսում կներկայացվեն IP-հեռուստատեսության հնարավորությունները, որը տարածաշրջանում առաջինը ներկայացնում է Ucom ընկերությունը` Ericsson-ի հետ համագործակցությամբ: