Համազգային Գիտության շաբաթը համախմբել է 400 դպրոց եւ մանկապարտեզ

Սեպտեմբերի 22–26-ին անցկացված «Գիտության շաբաթ․ Հայաստան»-ը համախմբել է կրթական հաստատություններին, ընտանիքներին եւ համայնքներին՝ գիտությունը մարդկանց առօրյային մոտեցնելու շուրջ։ 

Շաբաթվա ծրագրերին միացել է ավելին քան 400 դպրոց եւ մանկապարտեզ ամբողջ Հայաստանից՝ հնարավորություն տալով իր սաներին հետազոտելու հետաքրքրությունը զարգացնել հենց սեփական կրթական միջավայրում։

Գիտությունը բացահայտելու հնարավորությունները շարունակվել են նաեւ առցանց․ շաբաթվա ընդամենը հինգ օրում գիտական խաղերը խաղացել են ընդհանուր առմամբ ավելին քան 700 անգամ։ Իսկ մարզերում՝ ԿԳՄՍՆ երիտասարդական կենտրոնների հետ սերտ համագործակցությամբ, անցկացվել են «Հայաստանի նորարարության պատմությունները» ֆիլմաշարի ցուցադրությունները՝ Հայաստանի գիտության եւ նորարարության պատմությունները հասցնելով համայնքների երիտասարդներին։

Գիտությունն ու ստեղծագործական երեւակայությունը միավորել է «Հորիզոնից անդին» գիտաֆանտաստիկ պատմվածքների մրցույթը, որին ներկայացվել է ավելի քան 50 ստեղծագործություն։ Հաղթողների աշխատանքներն արդեն հրապարակված են Գիտության շաբաթվա կայքում․ դրանք հնարավոր է կարդալ առցանց կամ ներբեռնել։ 

Գիտության շաբաթվա ծրագրին միացավ նաեւ ՀՀ գիտությունների ազգային ակադեմիայի կազմակերպած «Հայաստանում Եվրոպական հետազոտողների գիշեր»՝ ERNA փառատոնը, որի գլխավոր գործընկերը «Գիտուժ» նախաձեռնությունն էր։ 

«Գիտության շաբաթը խրախուսում է հետաքրքրասիրությունը, քննադատական մտածողությունը, ստեղծագործությունն ու խնդիրների լուծումը։ Այն օգնում է, որ գիտությունը դառնա առօրյա զրույցների մաս դպրոցներում, ընտանիքներում, համայնքներում եւ հանրային տարածքներում։ Մեզ համար գիտությունը մտածելակերպ է, հանրային մշակույթ եւ ազգային առաջնահերթություն»,- նշել է «Գիտուժ» նախաձեռնության անդամ Տիգրան Շահվերդյանը։ 

Գիտության շաբաթն ավարտվել է, սակայն դրա ուսումնաօժանդակ նյութերն ու խաղերը շարունակելու են հասանելի մնալ՝ ապահովելով նախաձեռնության շարունակական ազդեցությունը։ 

Առցանց խաղերը կարելի է շարունակել խաղալ, իսկ աշխատանքային գրքույկները՝ ներբեռնել եւ օգտագործել ամբողջ տարվա ընթացքում՝ դպրոցում, մանկապարտեզում կամ ընտանիքում։ Խաղերը, գրքույկներն ու մրցույթի հաղթողների պատմվածքները հասանելի են այստեղ։ 

Գիտության շաբաթվա աջակիցներն էին ՀՀ կրթության, գիտության, մշակույթի եւ սպորտի նախարարությունը եւ ՀՀ գիտությունների ազգային ակադեմիան։ Տեխնոլոգիական գործընկերն է Team Telecom Armenia-ն, գիտաինտելեկտուալ գործընկերը՝ PMI Science գիտահետազոտական կենտրոն Հայաստանը։