Ճապոնիայի մայրաքաղաք Տոկիոյում մեկնարկել է «Japan IT Week» միջազգային տեխնոլոգիական ցուցահանդեսը, որտեղ ՀՀ բարձր տեխնոլոգիական արդյունաբերության նախարարությունը առաջին անգամ ներկայանում է «ՀԱՅԱՍՏԱՆ» միասնական տաղավարով։
Հայկական պատվիրակության կազմում ընդգրկված են ոլորտային առաջատար կազմակերպություններ, որոնք Japan IT Week-ի շրջանակներում կցուցադրեն հայկական տեխնոլոգիական էկոհամակարգի ձեռքբերումները։ Ցուցահանդեսի բացմանը ներկա կլինի Ճապոնիայում ՀՀ արտակարգ եւ լիազոր դեսպան Մոնիկա Սիմոնյանը։
Ցուցահանդեսին հայկական պատվիրակությունը ներկայացնում է Հայաստանի տեխնոլոգիական էկոհամակարգի վերջին զարգացումները, այդ թվում՝ Կառավարության կողմից իրականացվող աջակցության ծրագրերը, պետություն-մասնավոր համագործակցության հաջողված նախաձեռնություններն ու հեռանկարային նախագծերը, հայկական տեխնոլոգիական ընկերությունների նորարարական լուծումները, արտադրատեսակներն ու մատուցվող ծառայությունները։
Japan IT Week-ին մասնակցության նպատակն է ստեղծել նոր գործարար կապեր ոլորտի առանցքային դերակատարների հետ եւ ընդլայնել համագործակցության շրջանակները։
Japan IT Week-ը Ասիայի տեղեկատվական տեխնոլոգիաների եւ թվային լուծումների խոշորագույն ցուցահանդեսներից է, որը միավորում է հազարավոր առաջատար տեխնոլոգիական ընկերությունների եւ ոլորտի միջազգային փորձագետների։
Միջոցառումն իրականացվում է Ճապոնիայի միջազգային համագործակցության գործակալության (JICA) հետ համագործակցությամբ։
