Սեմ Ալթմանը $100 միլիոն կարող է ներգրավել իր կրիպտո ստարտափի համար

OpenAI-ի գործադիր տնօրեն Սեմ Ալթմանը պատրաստվում է 100 միլիոն դոլար ներգրավել կրիպտո ստարտափի համար, որը հավաքում է աչքի կենսաչափական տվյալները՝ ինքնությունը պարզելու համար։

OpenAI-ի գործադիր տնօրեն Սեմ Ալթմանը անցել է բանակցությունների «վերջնական փուլ»՝ 100 միլիոն դոլար հավաքելու Worldcoin ստարտափի համար, հայտնում է FT-ն։

Worldcoin-ը 2021 թվականին հավաքել է 25 միլիոն դոլար՝ Andreessen Horowitz-ից, Coinbase Global-ից, Khosla Ventures-ից, Day One Ventures-ից եւ LinkedIn-ի հիմնադիր Ռիդ Հոֆմանից:

Ալթմանը հիմնել է Worldcoin-ը 2019 թվականին իր գործընկերներ Կալիֆոռնիայի տեխնոլոգիական ինստիտուտի Տեսական ֆիզիկայի ամբիոնի նախկին ուսանող Ալեքսանդր Բլանիայիեւ Մաքս Նովենդստերի հետ: Վերջինս աշխատել է Bridgewater Associates ներդրումային ընկերությունում եւ Wave ֆինտեխ ստարտափում։

Ընկերության ղեկավարության խոսքով՝ լուծելու են երկու խնդիր, որոնք առաջացել են AI-ի արագ զարգացումից․ մարդկանց բոտերից տարբերելն ու հիմնական եկամտի ձեւ առաջարկելը, ինչը կարող է մեղմել կրճատումների ազդեցությունը՝ AI-ի ներդրմամբ պայմանավորված:

Worldcoin-ը պատրաստվում է օգտագործել ծիածանաթաղանթի սքանավորման տեխնոլոգիան՝ ստեղծելու ինքնության համաշխարհային համակարգ: Օգտատերը ներբեռնում է հավելվածը եւ աչքը սքանավորում օպտիկական համակարգով ներկառուցված հատուկ «գնդակ» սարքով։ Թե որտեղ եւ ինչպես հնարավոր կլինի գտնել սարքը, չի նշում։

Հենց համակարգը ճանաչի ծիածանաթաղանթը, օգտատիրոջ տվյալները կավելացվեն «վավերացված մարդկանց» տվյալների բազայում եւ նրանց կտրամադրվի թվային կոդ՝ եզակի գաղտնագիր։

Bloomberg-ը 2021-ին գրել էր, որ սքանավորման դիմաց մարդը կստանա կրիպտոարժույթ, եւ նախագիծն ունի նաեւ Worldcoin տոկեններ, սակայն պարզ չէ, թե ինչպես դա կաշխատի:

Մինչեւ 2023 թվականի մայիսը նախագիծն աշխատել է բետա ռեժիմով։ Առաջիկա շաբաթների ընթացքում հնարավոր է կայանա դրա հրապարակային գործարկումը։