ՀՌՀ ուսանողները կներգրավվեն Թումո լաբերի ինքնուսուցման անվճար ծրագրում

Հայ-Ռուսական համալսարանն ու Թումո ստեղծարար տեխնոլոգիաների կենտրոնը ստորագրել են համագործակցության հուշագիր, ըստ որի ուսանողները ներգրավելու են Թումո լաբերի ինքնուսուցման անվճար ծրագրում:

Ըստ հուշագրի՝ կողմերը փոխադարձ ճանաչելու են կրեդիտները եւ մասնագիտական, եւ ոչ մասնագիտական առարկաների համար։

Թումո լաբերի կրթական ծրագիրը կազմված է ուղղորդված ինքնուսուցման եւ գործնական նախագծերի բաղադրիչներից` հնարավորություն տալով ուսանողներին ձեռք բերել գիտելիքներ տեխնոլոգիաների, կիրառական գիտության եւ ինժեներության ոլորտներում, այնուհետեւ ամբողջացնել դրանք գործնական հմտություններով։ Վարժանքների ամեն մի մակարդակի վերջում ինքնուսուցման մասնակիցներն իրականացնելու են մինի-նախագծեր, որոնք օգնելու են հասկանալ, թե որքանով են յուրացրել այդ մակարդակի թեմաները։

Հայ-Ռուսական համալսարանի ռեկտոր, պրոֆեսոր Արմեն Դարբինյանն ասել է, որ կարեւորում են ԹՈՒՄՈ-ն՝ հայկական կրթական բրենդն աշխարհում առաջ տանելու համար:

«Բարձր ենք գնահատում մեր համագործակցությունը, ջանքեր չենք խնայելու մեր համագործակցությունն ավելի զարգացնելու եւ ընդլայնելու համար»,- նշել է Արմեն Դարբինյանը։

Թումո ստեղծարար տեխնոլոգիաների կենտրոնի զարգացման գծով տնօրեն Բեկոր Փափազյանն ասել է, որ Թումոն սկսել են կարեւորել ակադեմիական միջավայրում, «այն կարեւոր է դառնում բուհերի համար, եւ սա առանցքային է մեզ համար»։  

Նշվում է, որ ծրագրի վարժանքները եւ մինի-նախագծերը հաջողությամբ կատարելուց հետո ուսանողները հնարավորություն են ստանալու մասնակցել ՏՏ ընկերությունների հետ Թումո լաբերի գործնական նախագծերին: