Սեպտեմբերի 7-ին Կալիֆոռնիայի Սթիվ Ջոբսի թատրոնում Apple-ը պաշտոնապես ներկայացրեց iPhone 14 սմարթֆոնների շարքը, որը ներառում է չորս սարք, դրանց թվում չկա կոմպակտ մինի տարբերակ. այն փոխարինվեց բազային մոդելի ընդլայնված տարբերակով, որը կոչվում է iPhone14 Plus:
Ներկայացնում ենք այն ամենը, ինչ դուք պետք է իմանաք նորույթների մասին:
iPhone 14 եւ iPhone 14 Plus
Հիմնական iPhone 14-ն ունի 6,1 դյույմանոց էկրան, մինչդեռ iPhone 14 Plus-ն ունի 6,7 դյույմանոց էկրան: Բացի չափից, դրանք փոքր-ինչ տարբերվում են լուծաչափով, մնացած ցուցանիշներով նույնական են՝ պայծառությունը մինչեւ 1200, Dolby Vision աջակցություն, TrueTone տեխնոլոգիա, 2000000:1 կոնտրաստի հարաբերակցություն:
Երկու սմարթֆոնն էլ պահպանում է Face ID սենսորների եւ 12 մեգապիքսելանոց սելֆի տեսախցիկի ծանոթ կտրվածքը, սակայն վերջինս առաջին անգամ ստանում է ավտոմատ ֆոկուս: Ընդհանուր դիզայնը նույնն է՝ հարթ ծայրերով եւ ապակե հետեւի վահանակով:
Առաջին անգամ երկար տարիների ընթացքում Apple-ի նոր սմարթֆոնները մնացել են հին պրոցեսորներով, թեեւ փոքր-ինչ բարելավված են: Դրանք ստացել են նույն A15 Bionic-ը, ինչպես iPhone 13-ում, բայց ավելի հզոր գրաֆիկայով (5 միջուկ նախկին 4-ի փոխարեն):
Հետին երկու տեսախցիկը 12 մեգապիքսել է: Առաջինը ստացել է ընդլայնված սենսոր, F / 1.5 բացվածք եւ նոր մատրիցային հերթափոխի կայունացում, որը նախկինում օգտագործվում էր միայն Pro տարբերակներում:
Արտադրողը նաեւ նշում է, որ լուսավորության պակասի դեպքում տեսախցիկը ավելի շատ լույս է գրավում, իսկ գիշերային նկարահանումները բարելավելու համար կարելի է կիրառել Photonic Engine մշակման նոր ալգորիթմը, որը կարող է կիրառվել նույնիսկ սելֆիների վրա։
Երկու սմարթֆոնն էլ ստացել է արբանյակային SOS ահազանգ, որը թույլ կտա արտակարգ իրավիճակներում միանալ արբանյակին՝ առանց Wi-Fi-ի եւ շարժական ինտերնետի օգտագործման: Օգտատերը կկարողանա հատուկ հաղորդագրություններ եւ դրանց գտնվելու վայրն ուղարկել փրկարար ծառայություններին, սակայն դա կաշխատի միայն որոշ երկրներում (առայժմ՝ ԱՄՆ-ում եւ Կանադայում):
ԱՄՆ-ում iPhone 14-ը կթողարկվի առանց SIM քարտի բնիկի: Օգտատերերը կկարողանան օգտագործել միայն eSIM՝ տարբեր օպերատորների միջեւ անցնելու հնարավորությամբ: Այլ երկրների տարբերակները կունենան SIM քարտի ֆիզիկական բնիկ:
Բազային iPhone 14-ը կթողարկվի սեպտեմբերի 16-ին, իսկ iPhone 14 Plus-ը՝ հոկտեմբերի 7-ին: Գները հետեւյալն են՝
• iPhone 14՝ սկսած 799 դոլարից;
• iPhone 14 Plus՝ սկսած 899 դոլարից:
iPhone 14 Pro եւ iPhone 14 Pro Max
Նոր սմարթֆոնների Pro տարբերակների հիմնական տարբերություններից մեկը դիմային կտրվածքի փոխարեն էկրաններն են։ Apple-ն առաջինն է, որ օգտագործում է այս տեխնոլոգիան, թեեւ այն երկար ժամանակ օգտագործվում է Android սարքեր արտադրողների կողմից։
Էկրանի կենտրոնում գտնվող այս հատվածը կոչվում է Դինամիկ կղզի (Dynamic Island), որն ծանուցումների սեւ ֆոնի շնորհիվ անտեսանելի կլինի ծանուցումներ կամ համակարգի տարբեր տեղեկություններ ցուցադրելիս:
Էկրանի չափսերը նույնն են, ինչ iPhone 14-ի եւ iPhone 14 Plus-ինը, բայց դրանք տարբերվում են շատ ավելի նեղ շրջանակներով եւ առավելագույն պայծառությամբ:
Էկրանները կարող են նաեւ աշխատել Always On Display ռեժիմում՝ 1 Հց թարմացման արագությամբ՝ ցուցադրելով ստատիկ տեղեկատվություն նվազագույն էներգիայի սպառմամբ:
iPhone 14 Pro-ի եւ iPhone 14 Pro Max-ի մեկ այլ առավելություն է բոլորովին նոր A16 Bionic պրոցեսորը: Այն հագեցած է բարձր արդյունավետությամբ երկու միջուկներով, որոնք սպառում են 20%-ով քիչ էներգիա եւ համալրված են չորս էներգաարդյունավետ միջուկով: Դրանք լրացվում են 16-միջուկանի նեյրոշարժիչով եւ 5-միջուկանի գրաֆիկական չիպով:
Pro տարբերակները նաեւ ստացել են բարելավված տեսախցիկներ՝ յուրաքանչյուրն ունի երեք մոդուլ՝ 48 ՄՊ հիմնական սենսորով: Վերջինս ունի նոր 7 տարրի օպտիկա, f/1.78 բացվածք եւ 24 մմ կիզակետային երկարություն:
48 MP կադրերը սեղմվում են 12 MP-ի մեջ, ինչպես շատ այլ ֆլագմաններ, համատեղելով պիքսելների քառյակներ՝ նկարի որակը բարելավելու համար:
12 ՄՊ լայնանկյուն տեսախցիկը 6 տարրի օպտիկայով կարող է օգտագործվել մակրոների համար: Իսկ հեռաֆոտոն այժմ թույլ է տալիս օգտագործել ոչ միայն ×3 մոտավորությունը, այլեւ ×2՝ առավելագույն հստակությամբ: Բոլոր տեսախցիկներն այժմ գրավում են 50% ավելի լույս, քան նախորդ տարվա Pro տարբերակները: Այս ամբողջը լրացնում է վերանախագծված ֆլեշը. այն դարձել է երկու անգամ ավելի պայծառ եւ այժմ հարմարվում է կիզակետային երկարությանը:
Առանձին ուշադրության է արժանի կինոնկարահանման ռեժիմը, որը «ստեղծվել է իսկական պրոֆեսիոնալների համար»։ Այն թույլ է տալիս նկարել 4K/30 կադր/վ եւ 4K/24 կադր/վ արագությամբ:
Բոլոր չորս նոր սմարթֆոններն աջակցում են ավտովթարների ավտոմատ ծանուցումներ, ինչպես նաեւ նոր Apple Watch Series 8 եւ Ultra:
iPhone 14 Pro-ն եւ iPhone 14 Pro Max-ը հասանելի կլինեն ԱՄՆ-ում սեպտեմբերի 16-ից (նախնական պատվերները սեպտեմբերի 9-ից): Օգտատերերին հասանելի կլինեն մինչեւ 1 ՏԲ հիշողության տարբերակներ:
Գները հետեւյալն են՝
• iPhone 14 Pro՝ սկսած 999 դոլարից;
• iPhone 14 Pro Max՝ սկսած 1099 դոլարից:
