Լոռու մարզի Լեռնապատ գյուղում կառուցվող ԱԹՍ օդանավակայանում տարածքում սեպտեմբերի 18-ին կկայանա «Հաւք 2021» առաջին ԱԹՍ մրցույթը, որին կմասնակցի 30 թիմ։
Առաջատար տեխնոլոգիաների ձեռնարկությունների միությունից հայտնում են, որ մրցույթի նպատակն է մասնակիցներից լուծումներ ստանալ՝ անօդաչու թռչող սարքերի միջոցով արտակարգ իրավիճակներում փրկարարական միջոցառումների արդյունավետության բարձրացման համար։
Մրցույթն իրականացվելու է երեք անվանակարգում՝ դպրոցահասակներ, սիրողական խմբեր ու սկսնակ ընկերություններ եւ մասնագիտացած ընկերություններ։
Թիմերից 16-ը դպրոցական են, 11-ը՝ սիրողական, 3-ը՝ մասնագիտական։
Խմբերի առաջ դրվելու է երեք խնդիր. կրակի օջախի հայտնաբերում, տուժածի հայտնաբերում եւ գոյատեւման փաթեթի առաքում, հեղուկ նյութերի սփռում։
Մրցույթն իրականացվում է ԵՄ Հորիզոն 2020 «Ռեսպոնդրոն» ծրագրի շրջանակում, որը միտված է արտակարգ իրավիճակներում իրավիճակային իրազեկման համակարգի զարգացմանն ու կիրառմանը, ինչպես նաեւ առաջին արձագանքողին անհրաժեշտ տեղեկատվության եւ կապի ծառայությունների տրամադրմանը:
