«Տելեկոմ Արմենիա»-ի աջակցությամբ «Կոդավորման հմտություններ» նախագիծն ընդլայնում է իր սահմանները

«Տելեկոմ Արմենիա» ընկերությունը (Beeline ապրանքանիշ), Բրիտանական խորհրդի հայաստանյան գրասենյակը եւ ՀՀ կրթության, գիտության, մշակույթի եւ սպորտի (ՀՀ ԿԳՄՍ) նախարարությունը սկսում են «Կոդավորման հմտություններ. կամրջելով ներկան եւ ապագան» ծրագրի մարզային փուլը, որի շրջանակում Հայաստանի մարզային երեք հիմնական դպրոցներում կդասավանդվի կոդավորման արտալսարանային դասընթացներ։

Ծրագրի ընդլայնումը հնարավոր դարձավ, հաշվի առնելով տարեսկզբին մայրաքաղաք Երեւանի երեք դպրոցներում իրականացրած պիլոտային փուլի հաջողությունն ու ստացված դրական արձագանքները։

Այս նախագիծը միտված է զարգացնելու աշակերտների կոդավորման հիմնարար հմտությունները, ինչպես նաեւ թվային եւ այլ առանցքային ունակությունները՝ ներառյալ քննադատական եւ վերլուծական մտածողություն, ստեղծարարություն եւ համագործակցային աշխատանք: Դասընթացներն անցկացվելու են Micro:bit ծրագրավորելի միկրո-սարքավորումներով, որոնց միջոցով աշակերտները կարող են առաջարկել նորարարական լուծումներ եւ ստեղծել առօրյա կյանքում կիրառելի նախագծեր։ Ծրագրի այս փուլում շահառու դպրոցներ են ընտրվել Սեւանի Վլադիմիր Կարապետյանի անվան թիվ 3, Գյումրու Ջ. Բայրոնի անվան թիվ 20 եւ Աշտարակի Սմբատ Շահազիզի անվան թիվ 2 հիմնական դպրոցները։ Ծրագիրը ներդրվելու է նշված դպրոցներում արդեն գործող Բրիտանական խորհրդի անգլերենի ակումբներում, ինչը էապես կբարձրացնի դրա արդյունավետությունը, հաշվի առնելով նաեւ աշակերտների անգլերենի եւ այլ առանցքային հմտությունների տիրապետումը։

Ծրագրի մեկնարկից առաջ շահառու դպրոցների ՏՀՏ եւ անգլերենի ուսուցիչները անցել են micro:bit գործիքակազմի օգտագործման վերապատրաստումներ։ Դպրոցներին տրամադրվել էր micro:bit սարքեր, դասավանդման եւ ուսումնառական համապատասխան ռեսուրսներ: Ծրագրի այս փուլում ընդգրկված է շուրջ 70 աշակերտ:

Ծրագրի Մարզային փուլի մեկնարկի առիթով «Տելեկոմ Արմենիա» ընկերության Բրենդի զարգացման եւ հաղորդակցության տնօրեն Աշոտ Բարսեղյանը նշել է. «Շատ ուրախ ենք, որ այս հիանալի նախագիծը հասանելի դարձավ նաեւ մարզերում: Մարզերի պատանիներն էլ այժմ կկարողանան բացահայտել իրենց ներուժը կոդավորման ոլորտում ու նոր հնարավորություններ կունենան իրենց ապագա մասնագիտությունն ընտրելու հարցում»:

«Անչափ ուրախ ենք, որ «Տելեկոմ Արմենիա» ընկերության եւ ՀՀ կրթության, գիտության, մշակույթի եւ սպորտի նախարարության աջակցությամբ կարող ենք այս ուսուցման եւ զարգացման հիանալի հնարավորությունը առաջարկել մարզային դպրոցների աշակերտներին։ Նախագծի հաջող  իրականացումը Երեւանում ապացուցեց, որ եթե կա հնարավորություն, ապա մեր աշակերտներն ունեն մեծ ցանկություն եւ ունակություններ ուսումնասիրելու կոդավորման հիմունքները, զարգացնել առանցքային հմտությունները հետաքրքիր եւ ինտերակտիվ մեթոդաբանությամբ։ Այս հնարավորությունը առաջարկելով մարզերում բնակվող աշակերտներին, մենք նաեւ փորձում ենք ապահովել հավասար հասանելիություն բարձրակարգ ուսուցմանը, ինչը հեռանկարոում կարող է դրականորեն ազդել նրանց ապագա կրթության եւ կարիերայի վրա»,- նշել է Հայաստանում Բրիտանական խորհրդի կրթական ծրագրերի ղեկավար Ադդէ Հովասափյանը: