Հայկական թիմը՝ Վորոնեժում կայացած «Ռոբոարտ-2021»-ի մեդալակիր

Մարտի 22-28-ը Ռուսաստանի Վորոնեժ քաղաքում առցանց ձեւաչափով տեղի է ունեցել «Ռոբոարտ-2021» միջշրջանային ռոբոտաշինության մրցույթ-փառատոնը, որի կազմակերպիչն էր «Էքսպերիմենտալ տեխնիկական դպրոցը»։

Միջոցառմանը ներգրավված էին 1000-ից ավելի մասնակիցներ Ռուսաստանի 48 շրջաններից, Բելառուսից, Ղազախստանից եւ Հայաստանից։

Հայաստանը ներկայացնում էր «Ֆիզմաթ-Հայաստան» թիմը, որի անդամներն էին ԵՊՀ-ին առընթեր Ա. Շահինյանի անվան ֆիզիկամաթեմատիկական հատուկ դպրոցի 11-րդ դասարանի աշակերտ Նարեկ Սարգսյանը եւ 10-րդ դասարանի աշակերտ Գեւորգ Սարգսյանը։

Մրցույթի թեժ պայքարի ընթացքում մասնակից թիմերը կատարել են փորձի փոխանակում, միմյանց են հաղորդել իրենց գաղափարները եւ ձեռք են բերել նոր գիտելիքներ։ Մրցույթի անցկացման օրերին կազմակերպվել են առցանց դասընթացներ, էքսկուրսիաներ, խորհրդատվություններ միջազգային մասնագետների հետ։

Հայկական թիմը մրցույթի շրջանակում ներկայացրել է երեք նախագիծ՝ «Խելացի տուն», «Բիոնիկ ձեռք», «Դաշնակահար ռոբոտ». բոլոր նախագծերն էլ զբաղեցրել են մրցանակային տեղեր։ «Ֆիզմաթ-Հայաստան» թիմն արժանացել է 2 ոսկե եւ 1 արծաթե մեդալի.

- առաջին տեղ՝ ոսկե մեդալ. «Խելացի տուն» անվանակարգում՝ «Խելացի տուն» նախագիծը,
- առաջին տեղ՝ ոսկե մեդալ. «3D մեխանիկա» անվանակարգում՝ «Բիոնիկ ձեռք» նախագիծը,
- երկրորդ տեղ՝ արծաթե մեդալ. «Կիբեռնետիկական արվեստ» անվանակարգում՝ «Դաշնակահար ռոբոտ» նախագիծը: