18:04 | 20.01.21 | Նորություններ | 4580

Նվազել են կապի օպերատորների կողմից պետական բյուջե վճարված հարկերը

ՀՀ կապի երեք օպերատորները՝ Ucom-ը, Beeline-ը եւ ՎիվաՍել-ՄՏՍ-ը 2020թ. հունվար-դեկտեմբեր ամիսներին պետական բյուջե են վճարել 30.08 մլրդ դրամի հարկ, ինչը 3.2%-ով ցածր է անցած տարվա ցուցանիշից (նախորդ տարվա նույն ժամանակահատվածում վերջիններիս կողմից պետական բյուջե է վճարվել 31.07 մլրդ դրամի հարկ):

ՀՀ 1000 խոշոր հարկատուների ցանկի համաձայն՝ կապի   օպերատորների շրջանում ամենախոշոր հարկատուն ՎիվաՍել-ՄՏՍ ապրանքանիշը ներկայացնող «ՄՏՍ Հայաստան» ընկերությունն է: Այն 2020թ. չորրորդ եռամսյակի տվյալներով պետբյուջե է վճարել 13.01 մլրդ դրամի հարկ, ինչը 31.6%-ով ավել է նախորդ տարվա նույն ժամանակահատվածի ցուցանիշից:

Խոշոր հարկատուների ցանկում ընկերությունը 2020թ. չորրորդ եռամսյակի տվյալներով զբաղեցրել է 10-րդ տեղը՝ նախորդ տարվա նույն      ժամանակահատվածի 14-րդ տեղի փոխարեն:

Ոլորտի մյուս խոշոր հարկատուն Beeline ապրանքանիշը ներկայացնող «Տելեկոմ  Արմենիա» ընկերությունն է՝ 8.84 մլրդ դրամ հարկերի ծավալով: Ընկերության վճարած հարկերը նվազել  են 27.8%-ով, եւ այն ընդհանուր հարկատուների ցանկում 10-րդից դարձրել է 12-րդը (նախորդ տարվա նույն ժամանակահատվածում ապրանքանիշը ներկայացրել է «Վեոն Արմենիա» ընկերությունը):

Խոշորագույն հարկատուների ցանկում է նաեւ «Յուքոմ» ընկերությունը  (13-րդ տեղ 18-րդի փոխարեն), որն ընդհանուր առմամբ, պետբյուջե է վճարել 8.23 մլրդ դրամ հարկ, ինչը 8%-ով զիջում է 2019թ. ցուցանիշին:

1000 խոշոր հարկատուների ցանկում ինտերնետ մատակարարներից ընդգրկվել է նաեւ «Ռոստելեկոմ» ապրանքանիշով գործող «ՋԻԷՆՍԻ-ԱԼՖԱ» ընկերությունը      (121-րդ տեղ՝ 176-ի փոխարեն, 1.56 մլրդ դրամ, աճ՝ 41.1%):

Այվազյան Աննա