10:48 | 10.02.20 | Նորություններ | 7682
«Արմաթը» ներկայացվել է BASIS SOFTEXPO 2020 տեխնոլոգիական ցուցահանդեսում
«Արմաթ» ինժեներական լաբորատորիանեը ներկայացվել են Հարավային Ասիայի ամենախոշոր տեխնոլոգիական ցուցահանդեսում՝ 16-րդ BASIS SOFTEXPO 2020-ում:
Այն մասնավոր սեկտորի մեծամասշտաբ ցուցահանդես է, որը կայացել է Բանգլադեշի մայրաքաղաք Դաքքայում՝ փետրվարի 6-9։
«Արմաթը» ցուցահանդեսին մասնակցել է «Development Innovation Platform» (DIP) հիմնադրամի հրավերով, որի հետ նախկինում ստորագրվել է համագործակցության հուշագիր։ Հիմնադրամը միտված է տարբեր շրջանակների փոխներգործությամբ (կառավարություն, մասնավոր սեկտոր, գիտական հանրություն) տեխնոլոգիական զարգացման խթանմանը։ Վերջինիս նպատակների ցանկում որպես առաջնահերթ կետ հստակ նշվում է Բանգլադեշի դպրոցներում Արմաթ լաբորատորիաների տեղադրման ու գործարկման անհրաժեշտությունը։
«Բազմաթիվ մարդիկ հայտնում են իրենց պատրաստակամությունը՝ աջակցելու ծրագրին, որպեսզի այն հաջող կերպով ներդրվի իրենց երկրում՝ Բանգլադեշում։ Հիմնադրամի ներկայացուցիչները բավականին շահագրգռված են այդ գաղափարով։ Ցուցահանդեսը դեռ շարունակվում է։ Նախատեսվում են հանդիպումներ տարբեր կրթական կառույցների ներկայացուցիչների հետ։ Արդյունքները կամփոփենք ցուցահանդեսի ավարտին,- նշել է ցուցահանդեսում «Արմաթի» ներկայացուցիչ Սոֆյա Հարությունյանը։
Ցուցահանդեսում «Արմաթը» ներկայացվում է, որպես դպրոցներում տեղակայված ինժեներական անվճար լաբորատորիա՝ 10-18 տարեկան երեխաների համար, որը խթանում է աճող սերնդի մոտ ինժեներական հմտությունների զարգացումը։
Կազմակերպիչները նաեւ շեշտում են այն փաստը, որ նախագծի նկատմամբ իրենց հետաքրքրությունն են հայտնել այնպիսի պետություններ, ինչպիսիք են Հնդկաստանը, Մոնղոլիան, Վրաստանը, Եթովպիան, Աֆղանստանն ու Ռուսաստանը։
«Միջազգային ցուցահանդեսները հանդիսանում են «Արմաթը» ներկայացնելու կարեւորագույն հարթակ մեր Միության համար, ուր հնարավոր է լինում առանձին հաճախորդներին բացատրել տեխնոլոգիայի առանձնահատկությունը», - մեկնաբանում է Առաջատար տեխնոլոգիաների ձեռնարկությունների միության գործադիր տնօրեն Կարեն Վարդանյանը։
Ցուցահանդեսի շրջանակում «Արմաթի» հարեւանությամբ տեղակայված է ԱՏՁՄ անդամ «Instigate» խմբի «Instigate Robotics» ընկերության տաղավարը։
«Նախկինում հուշագիր ենք կնքել DIP հիմնադրամի հետ, ըստ որի նրանք ցանկանում են մեր արտադրանքն իրացնել Բանգլադեշում։ Ստացանք առաջարկ, որ «Instigate Robotics»-ը եւս ներկայանա ցուցահանդեսին, ինչից հետո ուղարկեցինք անհրաժեշտ նյութերը, որպեսզի հիմնադրամը դրանք ներկայացնի այցելուներին», - նշել է Instigate Robotics ընկերության տնօրեն Սուսաննա Առաքելյանը։
