Renderforest-ը ներկայացրել է բազմաֆունկցիոնալ վեբ կայքեր ստեղծելու նոր գործիք

Վիդեո անիմացիաների եւ լոգոների ստեղծման Renderforest հարթակը ներկայացրել է բազմաֆունկցիոնալ վեբ կայքերի պատրաստման նոր գործիք՝ ներկայանալով որպես «երեքը մեկում» բրենդավորման հարթակ։

Կայքերի նախագծման գործիքը Renderforest-ի հիմնադիր Նարեկ Սաֆարյանը ներկայացրել է ընկերության նոր գրասենյակի բացմանը` հուլիսի 25-ին։

Գործիքը նախատեսված է ինչպես մասնագետների, այնպես էլ խմբագրման եւ դիզայներական խորը գիտելիքներ չունեցող օգտատերերի համար։

Հնարավորինս պարզեցնելով կայքերի պատրաստման գործընթացը՝ ընկերության նպատակն է ապահովել օգտատերերին բրենդավորման անհրաժեշտ գործիքներով։

Ընտրելով համապատասխան բաժինը՝ օգտատերերը կարող են գտնել մասնագետների կողմից մշակված վեբ կայքերի օրինակներ, խմբագրել դրանք կամ օգտագործել պատրաստի դիզայնը եւ բովանդակությունը։

Առաջիկայում Renderforest-ի թիմը նոր գրասենյակի շենքում պլանավորում է նաեւ փորձի փոխանակման եւ ճանաչողական սեմինարներ կազմակերպել։

Հայաստանում հիմնադրված Renderforest ընկերությունն առաջարկում է տեսանյութերի, լոգոների եւ անիմացիոն հոլովակների պատրաստման առցանց գործիքներ։ Հայտնի G2crowd հարթակը հայաստանյան ընկերությանն ընդգրկել է 2019թ.ծրագրավորման 100 լավագույն գլոբալ ընկերությունների շարքում (Best Software Companies 2019 Awards):