Երեւանում կբացվի ռուսական Deworkacy ցանցի քովորքինգ տարածքը

Ռուսական Deworkacy գործարար տարածքների ցանցը հայտարարել է հայաստանյան շուկա դուրս գալու եւ Երեւանում քովորքինգ տարածք գործարկելու մասին:

Ինչպես հաղորդում է Rusbase բիզնես պորտալը, Deworkacy-ն կդառնա ռուսական համանման առաջին ցանցը, որը կընդլայնի իր բիզնեսը ՌԴ սահմաններից դուրս:

Deworkacy-ն Երեւանում կսկսի գործել փետրվարի 5-ից: Տեղակայված կլինի «Արտասահմանյան երկրների հետ մշակութային համագործակցության հայկական ընկերություն» (ԱՕԿՍ) ՀԿ-ի տարածքում:

Տարածաշրջանային գործադիր տնօրեն կդառնա Ջուլյա Թումասյանը:

Ծառայությունների թվում են աշխատանքային տարածքները, բանակցությունների եւ գործնական միջոցառումների համար նախատեսված սրահները: Քովորքինգ տարածքը Deworkacy-ի բոլոր ռեզիդենտների համար կգործի անվճար սկզբունքով, ուստի ցանցի հաճախորդները կկարողանան Հայաստան մեկնել երկար ժամանակով:

Deworkacy-ում նշել են, որ «արտասահմանում քովորքինգի համար Երեւանի ընտրությունը պայմանավորված է մեծ թվով ամերիկացի ներդրողների եւ հյուրընկալ մշակույթի, ինչպես նաեւ ձեռնարկատիրական միջավայրի առկայությամբ»: Փետրվարի 22-ին Երեւանում նախատեսված է առաջին միջոցառումը:

Banks.am-ի հետ զրույցում Deworkacy Yerevan AOKS-ում նշել են, որ բաց են ՏՏ կազմակերպությունների, մշակույթի եւ այլ ոլորտների ներկայացուցիչների հետ համագործակցության համար: