ՎիվաՍել-ՄՏՍ-ի ռոումինգից օգտվողները ծանուցում կստանան տվյալ երկրում ՀՀ ԱԳՆ ներկայացուցչության մասին

Արտերկրում Հայաստանի Հանրապետության դեսպանատների ու հյուպատոսությունների վերաբերյալ տեղեկություններն արդեն հասանելի են Հայաստանից արտերկիր մեկնած ՎիվաՍել-ՄՏՍ-ի բաժանորդների համար:

Արտերկիր ժամանելուց հետո այդ երկրի բջջային ցանցում գրանցվելուն պես՝ բաժանորդը ստանում է SMS անվճար ծանուցում, որտեղ նշված է տվյալ երկրում ՀՀ դեսպանատան կամ հյուպատոսության կայքէջերն ու ԱԳՆ թեժ գծի հեռախոսահամարը:

«ՎիվաՍել-ՄՏՍ-ը Հայաստանում գործող դեռեւս միակ օպերատորն է, որ մատուցում է նմանատիպ ծառայություն: Ծառայությունը գործարկվել է ՀՀ Արտաքին գործերի նախարարության նախաձեռնությամբ եւ նպատակ ունի արտերկիր մեկնող ՀՀ քաղաքացիներին իրազեկել ՀՀ դիվանագիտական առաքելությունների գտնվելու վայրի եւ կոնտակտային տվյալների վերաբերյալ, ինչը հատկապես կարեւոր է տվյալ երկրում արտակարգ իրավիճակների դեպքում արագ կապ հաստատելու տեսանկյունից»,- նշված է ընկերության տարածած հաղորդագրությունում:

ՎիվաՍել-ՄՏՍ-ը միջազգային ռոումինգի ծառայություններ է մատուցում աշխարհի շուրջ 200 երկրում՝ 564 ռոումինգ գործընկերների ցանցերում: