Աշխատանքն ու առօրյան PicsArt-ում

Հայաստանում վերջին տարիներին հարյուրավոր նոր ՏՏ ընկերություններ բացվեցին: Դրանք տարբերվում են չափերով, գործունեության ուղղություններով, ինչպես նաեւ աշխատանքային միջավայրով: Itel.am-ն իր նոր շարքում փորձում է ներսից բացահայտել հայաստանյան ՏՏ ընկերությունների աշխատանքային առանձնահատկությունները:

PicsArt-ը, որն ունի գրասենյակներ Երեւանում եւ Սան Ֆրանցիսկոյում, ներկայացնում է լուսանկարների մշակման, կոլաժների պատրաստման, նկարելու եւ համատեղ խմբագրելու համար նախատեսված հավելված եւ սոցիալական ցանց: Այն ունի 400 միլիոնից ավելի ներբեռնում եւ ամսական 90 միլիոն ակտիվ օգտատեր:

Հավելվածը հասանելի է 20 լեզուներով եւ անվճար է iOS, Android եւ Windows հարթակների համար:

Արտավազդ Մեհրաբյան, ընկերության համահիմնադիր տնօրեն

Գրասենյակում ժամային սահմանափակում չկա, քանի որ աշխատում ենք արդյունքի եւ ոչ թե «ժամ լրացնելու» վրա:

Ընդմիջման ժամերը թողնված են աշխատողների խղճի վրա, եւ թիմային աշխատանքը նրանց ստիպում է պահել լանչի ժամերը (ժպտում է – խմբ.):

Քանի որ աշխատում ենք «fun and entertainment» ոլորտում, ամեն ինչ անում ենք, որ մեր PicsArt-ցիների աշխատանքային միջավայրը եւս այդպիսին լինի: Աշխատողներն ազատ են օգտվել Youtube-ից, խաղեր խաղալ՝ դա մեր աշխատանքի մի մասն է: Եթե ցանկանում ես պրոդուկտ ստեղծել՝ թիրախավորելով երիտասարդներին, ապա պետք է ինքդ ապրես այդ ոճով:

Հաշվի առնելով այն, որ մեր մյուս գրասենյակը Սան Ֆրանցիսկոյում է եւ առկա է 12 ժամվա տարբերություն, օնլայն լինելը մեր թիմում ամենակարեւոր գործոններից է: Եթե կարողանում եք ճիշտ օգտագործել ժամային գոտիների տարբերությունը, ապա դա վերածվում է շուրջօրյա աշխատող համակարգի:

Արտավազդ Մեհրաբյանը

Շաբաթ եւ կիրակի օրերին չենք աշխատում, բայց շատերը նախընտրում են գրասենյակ գալ: Տանից աշխատելն էլ խնդիր չէ մեզ համար: Աշխատանքի բնույթն այնպիսին է, որ հնարավոր է, օրինակ, 2 օր շատ ծանրաբեռնված աշխատենք, հետո մի քանի օր ավելի թեթեւ ռեժիմով: Գրասենյակը բաց է շուրջօրյա:

Տանից աշխատելը նորմալ է դիտվում՝ անհրաժեշտության դեպքում:

Ներքին հաղորդակցությունը կազմակերպվում է Slack հարթակի միջոցով: Էլփոստ հազվադեպ ենք օգտագործում:

Աղմուկը մեր գլխավոր խնդիրներից է, քանի որ գրասենյակը open space է: Աղմուկից խուսափելը դժվար է, բայց փորձում ենք խնդրի կարգավորման տարբերակներ գտնել: Հնարավոր է՝ աղմուկի դետեկտորներ դնենք, եւ նրանք, ովքեր գերազանցեն նորմը, նկատողություն կստանան (ժպտում է – խմբ.): Իրականում բարդ է վերահսկել, տնօրինությունն էլ է մեկ-մեկ մոռանում ու բարձր խոսում: Խրախուսում ենք, որպեսզի նման բան նկատելու դեպքում մեզ զգուշացնեն: Ի դեպ, բոլորս աշխատում ենք նույն տարածքում, առանձնասենյակ մեզ մոտ չկա:

Picsart-ի ամենամեծ հավաքույթը երեւի մեր 5-ամյակի միջոցառումն էր:

Ընկերության հաջողությունները տոնելը կախված է դրանց մասշտաբայնությունից: Եթե ինչ-որ նպատակ է դրված, որին հասել ենք, կամ մեծ համակարգ է մշակվել, դա անպայման նշում ենք:

Մադլեն Մինասյան, Կոնտենտի գծով թիմի ղեկավար

Իմ աշխատանքային օրը սկսվում է ժամը 10:00-ին: Թիմում մարդիկ տարբեր մասնագիտություններ ունեն՝ օպերային երգիչ, լողորդ, նկարիչ: Կարծում եմ՝ բազմազանության գործոնը մեծ արժեք է հաղորդում կոնտենտին, քանի որ մեզ հարկավոր են մարդիկ, որոնք շաբլոնից դուրս կմտածեն:

Ամեն օր՝ ժամը 12:00-ին, թիմային հանդիպման ընթացքում ծանոթանում ենք օրվա նորություններին:

Դեմքով ճանաչում եմ գրեթե բոլոր՝ 350 աշխատողներին, եւ եթե անգամ անմիջապես շատերի հետ չեմ աշխատում, պարտադիր բարեւում եմ:

Մադլեն Մինասյանը

Մեր գրասենյակի առավելություններից է այն, որ ոչ ոք ժամացույցը ձեռքին քեզ չի հետեւում: Մենք վստահում ենք մեր աշխատակիցներին:

Մեր թիմն ընկերությունում ամենամեծն է՝ 40 մարդ: Ես հասկացել եմ հետեւյալը՝ երբ դու մենեջեր ես, դու բոսս չես, դու մենթոր ես: Դու մարզում ես տվյալ մարդուն, որպեսզի նա դառնա վաղվա մենթորը: Դու տրամադրում ես նրան կյանքի որակ, որպեսզի նա քեզ համար լավ պրոդուկտ պատրաստի: Ավելի լավ է նստեմ եւ փորձեմ հասկանալ, թե ինչը կօգնի տվյալ մարդուն ավելի արդյունավետ աշխատել, քան թե զուտ բարկանալ:

PicsArt-ի խոհանոցում անվճար են հյութերը, բայց ես նախընտրում եմ սովորական ջուրը:

Հարություն Մարտիրոսյան, Ինժեներական թիմի ղեկավար

Արդեն 3 տարի է՝ աշխատում եմ PicsArt-ում եւ այդ ընթացքում նոութբուքիցս եւ ուսապարկիցս «ոչ մի րոպե չեմ բաժանվում»:

Հարություն Մարտիրոսյանը

Աշխատում եմ արձակուրդները կցել բիզնես ճամփորդությունների հետ. արդեն 4 անգամ բիզնես ճամփորդություն եմ ունեցել՝ մեկ անգամ Եվրոպայում, երեք անգամ՝ ԱՄՆ-ում:

Հին աշխատողներից 70-80-ին ճանաչում եմ: Եթե աշխատանքի բերումով ինչ-որ նոր մարդու հետ պետք է աշխատել, գործընկերներից հարցնում եմ անունը եւ գրում:

Ազատ Մելիքյան, Ավագ iOS ծրագրավորող

Արդեն 4 տարի է՝ աշխատում եմ PicsArt-ում եւ առավոտյան աշխատանքի եմ գալիս որքան հնարավոր է վաղ՝ մինչեւ 10:30: Աշխատում եմ պահել աշխատանքային 8 ժամվա սահմանը:

Տնօրինության հետ շփման առումով արգելք չկա: Նրանք եւս աշխատում են նույն օpen space-ում: Շաբաթ-կիրակի օրերին հիմնականում չեմ գալիս աշխատանքի, սակայն բացառություններ լինում են:

Սեղանի թենիս, Xbox խաղալու համար ժամային սահմանափակում չկա: Ով որքան ուզում է՝ կարող է խաղալ, սակայն աշխատանքդ դրանից ամեն դեպքում չպետք է տուժի:

Ազատ Մելիքյանը

Ծննդյան տարեդարձերը տարբեր մարդիկ տարբեր ձեւով են նշում: Ոմանք գրում են ընդհանուր խմբում՝ բոլորին որոշակի ժամի խոհանոց հրավիրելով, եւ ով ցանկանում է՝ միանում է: Կան նաեւ մարդիկ, որոնք իրենց թիմի շրջանակում են նշում:

Գրասենյակում աշխատելուն միակ խանգարող գործոնը open space-ի աղմուկն է: Փորձում ենք գրասենյակում փոքր անկյուններ գտնել եւ այդտեղ աշխատել:

Open space-ի հաջորդ խնդիրը օդորակիչներն են: Մեր գրասենյակում դրանք հատվածավորված են, կարող ես կոնկրետ քո հատվածում կարգավորել ջերմաստիճանը, սակայն երբ նույն հատվածում մրսկան եւ չմրսկան մարդիկ են աշխատում, արդեն խնդիր է առաջանում:

Անի Թորանյան, Մարդկային ռեսուրսների կառավարման պատասխանատու

Աշխատանքի ընդունվելիս հարցազրույցները հիմնականում ես եմ վարում: Մենք առաջին հերթին կարեւորում ենք մարդկային կողմը: Քանի որ մեր ներքին մշակույթը մի փոքր յուրահատուկ է, մեզ համար կարեւոր է մարդու անկեղծությունը, բաց լինելը, հաղորդակցվելու դյուրությունը:

Երբ մարդու հետ 30-40 րոպե զրուցում ես, ինչ-որ թերություններ պահել հնարավոր չէ: Հաճախ եղել է այնպես, որ հակառակ նրան, որ դիմողը տեխնիկական լավ հմտություններ է ունեցել, նրան աշխատանքի չենք ընդունել, քանի որ մյուս՝ մարդկային կողմը մեզ համար բավական թերի է գնահատվել:

Անի Թորանյանը

Ինձ համար շատ կարեւոր է, որ HR-ը դրական բան փոխանցի իր աշխատակիցներին: Առավոտյան պարտադիր պտտվում եմ ամբողջ գրասենյակով, հետաքրքրվում, թե ինչպես են մյուսների գործերը:

Ներկա-բացակա անելը բարդ չէ, ընկերությունը բաժանված է խմբերի, եւ յուրաքանչյուր խմբի ղեկավար կառավարում է իր թիմը: Բացակայության դեպքում խմբի ղեկավարին պետք է տեղյակ պահել, առանց դրա չի թույլատրվում բացակայել:

Աստղիկ Մարգարյան, Դիզայնի թիմի ղեկավար

Մեր թիմում 15 դիզայներ եւ 10 իլյուստրատոր է աշխատում: Քանի որ թիմը փոքր է, մենք կենդանի շփումն ենք նախընտրում:

Աստղիկ Մարգարյանը

Հիշում եմ, երբ առաջին անգամ փոխեցինք PicsArt-ի դիզայնը, երկու օր լուսացրեցինք գրասենյակում: Դա անցած սեպտեմբերին էր: Ծանր աշխատանքին հաջորդեց ամենահիշարժան հավաքույթը:

Գրասենյակում ոչինչ չէի փոխի, քանի որ չգիտեմ՝ արդյո՞ք փոփոխության դեպքում ավելի լավ կլինի, թե ավելի վատ: Հիմա գործում է «ոսկե միջին»-ի տարբերակը:

Քրիս Գարդ, PicsArt-ի գործադիր կրեատիվ տնօրեն

Աշխատելով Սան Ֆրանցիսկոյում եւ տարին 6 անգամ այցելելով Հայաստան՝ կարող եմ ասել, որ երկու գրասենյակներում էլ վերաբերմունքը նույնն է՝ ընկերությունը մեր սեփական երեխան է:

Քրիս Գարդը

Երեւանի եւ Սան Ֆրանցիսկոյի տարբերությունն էներգիան է. Սան Ֆրանցիսկոյի գրասենյակը փոքր է, եւ այնտեղ հիմնականում ավագ մենեջերներն են աշխատում, տարիքով ավելի բարձր մարդիկ, իսկ երեւանյան գրասենյակը լի է երիտասարդ, էներգիայով լի մարդկանցով:

Նարինե Դանեղյան
Լուսանկարները՝ Էմին Արիստակեսյանի