ՀՀ-ն Կոլումբիայում մասնակցել է Ձեռներեցության համաշխարհային համաժողովին

Հայաստանը մարտի 14-17-ը Կոլումբիայի Մեդելին քաղաքում մասնակցել է Ձեռներեցության համաշխարհային ամենամյա համաժողովին: 

Մեր երկիրը համաժողովում ներկայացրել է Ձեռներեցության համաշխարհային շաբաթի հայաստանյան ներկայացուցիչ Անի Խաչատրյանը:

Itel.am-ի հետ զրույցում նա պատմել է, որ ամեն տարի այս համաժողովը համախմբում է հազարավոր ձեռներեցների, ներդրողների, հետազոտողների եւ ստարտափների աշխարհի ավելի քան 160 երկրից:

«Համաժողովի նպատակն է ներդրումների ներգրավման նոր հնարավորություններ ստեղծել, կատարել փորձի փոխանակում, ինչպես նաեւ ամփոփել նախորդ տարվա ձեռքբերումները: Սա հարթակ է ոլորտի լավագույն ներկայացուցիչների հետ նոր կապերի հաստատման համար»,- պատմել է Անի Խաչատրյանը:

Նա տեղեկացրել է, որ համաժողովի շրջանակում կայացել է ԱՄՆ-ի եւ Կոլումբիայի կառավարությունների կազմակերպած ՓՄՁ-ների նախարարական համաշխարհային համաժողովը:

«Դրան մասնակցել են նախարարներ 14 երկրից, ներկայացուցիչներ Եվրոպական հանձնաժողովից, Համաշխարհային բանկից եւ միջազգային այլ կառույցներից»,- պատմել է Անի Խաչատրյանը՝ ափսոսանք հայտնելով, որ Հայաստանը ներկայացված չի եղել նախարարական համաժողովում: 

Նրա խոսքով՝ այցի նպատակն էր համաժողովի մասնակիցներին ծանոթացնել Ձեռներեցության համաշխարհային ցանցի հայաստանյան ներկայացուցչության հիմնադրման գործունեությանը:

Հայաստանում Ձեռներեցության համաշխարհային շաբաթվա հիմնադիր եւ «Ստարտափ Արմենիա» կազմակերպության նախագահ Հայկ Ասրիյանցը իր հերթին տեղեկացրել է, որ համաժողովի շրջանակում կայացել է Startup Nations «չկոնֆերանսը» («Ստարտափ Արմենիա»-ն Startup Nations նախաձեռնության ներկայացուցիչն է Հայաստանում):

«Չկոնֆերանսը» հնարավորություն է տվել մասնակիցներին կիսվել իրենց երկրների համապատասխան փորձով, հասկանալ, թե բիզնեսում ինչն է այսօր աշխատում, ինչը՝ ոչ:

Հայաստանը համաժողովին մասնակցում է 2013-ից (Ռիո դե Ժանեյրո) ի վեր: Հիշեցնենք, որ 2014թ. համաժողովն անցկացվել է Մոսկվայում, իսկ 2015թ.՝ Միլանում:

Հայկ Ասրիյանցը տեղեկացրել է, որ 2017թ. Ձեռներեցության համաշխարհային համաժողովը տեղի կունենա Հարավաֆրիկյան Հանրապետության մայրաքաղաք Յոհաննեսբուրգում: