Facebook-ն այսուհետ «կտակ» թողնելու հնարավորություն է ընձեռում, որը սահմանում է օգտատիրոջ մահվանից հետո օգտահաշիվը տնօրինելու պայմանները:
«Երբ մարդը մահանում է, նրա օգտահաշիվը վերածվում է նրա կյանքի, ընկերների եւ տպավորությունների մասին հիշողության»,- ասված է Facebook-ի կայքում տեղադրված հաղորդագրությունում:
Կտակը հնարավորություն է ընձեռում օգտահաշվի օգտագործումը հանձնել մահացածի ընտանիքի անդամներից մեկին կամ ընկերոջը: Եթե որեւէ մեկը հաղորդում է, որ օգտատերը մահացել է, ապա մահացածի էջը ստանում է հատուկ կարգավիճակ:
Օգտահաշվի ժառանգորդը կարող է ժամանակագրական նշումներ կատարել օգտահաշվում (օրինակ, նշել մահվան ամսաթիվը), ինչպես նաեւ ընդունել նրա ընտանիքի այն անդամների ընկերանալու հրավերները, որոնք օգտատիրոջ կենդանության օրոք չեն հասցրել ընկերանալ նրա հետ:
Բացի այդ, օգտահաշվի ժառանգորդը կարող է փոխել գլխավոր լուսանկարները: Ժառանգորդը, սակայն, չի կարողանա հանգուցյալի օգտահաշիվ մուտք գործել նրա էլփոստի հասցեով եւ գաղտնաբառով, ինչպես նաեւ կարդալ նրա նամակագրությունը:
Օգտատերը կենդանության օրոք կարող է ընտրել նաեւ հատուկ գործառույթ, որը նրա մահից հետո կջնջի օգտահաշվի բոլոր տվյալները:
Օգտահաշիվը կտակելու համար պետք է մուտք գործել Settings, այնուհետ Security բաժինը եւ ընտրել Legacy Contact կոճակը:
