Ապրիլի 1-ից Ucom ընկերությունը Երեւանում սկսում է տրամադրել ֆիքսված հեռախոսակապի ծառայություն

Երեւան/Մեդիամաքս/. Ապրիլի 1-ից  Ucom ընկերությունը սկսում է տրամադրել  VoIP հեռախոսակապի U!Phone ծառայություն:

Ինչպես Մեդիամաքս-ին տեղեկացրեցին ընկերության մամլո ծառայությունում,
օպերատորի համարային շարքը սկսվում է  (060)  կոդով, իսկ վեցանիշ հեռախոսահամարների առաջին երկու նիշը 44 է : 

Ներցանցային զանգերի սակագինը 1 դրամ/րոպե է, դեպի ՀՀ ֆիքսված հեռախոսակապի այլ օպերատորներ զանգերի արժեքը 5 դրամ/րոպե է, դեպի ՀՀ բջջային ցանցեր` 28 դրամ/րոպե, միջքաղաքային զանգեր դեպի ՀՀ և ԼՂՀ ֆիքսված ցանցեր` 16 դրամ/րոպե: 
Ամսեկան բաժանորդավճարը կազմում է 600 դրամ: Ամեն ամիս բաժանորդներին տրամադրվելու է 180 րոպե անվճար խոսելաժամանակ դեպի այլ տեղական ֆիքսված հեռախոսային օպերատորներ: Միացման վճարը 12000 դրամ, սակայն Ucom-ի այլ ծառայություններից օգտվող բաժանորդների համար միացումը կկատարվի անվճար:

U! Phone ծառայությունը թույլ է տալիս կատարել տեսազանգեր, կոնֆերանս զանգեր, ինչպես նաեւ ցանկացած պահի ստուգել ընթացիկ հաշվեկշիռը: