Իլյա Սուցկվերի Safe Superintelligence-ը $2 մլրդ է դոլար ներգրավել

OpenAI-ի համահիմնադիր Իլյա Սուցկվերի Safe Superintelligence ընկերությունը 2 միլիարդ դոլար ներդրում է ստացել։ Ընկերության արժեւորումը հասել է 32 միլիարդ դոլարի, թեեւ այն դեռ չունի պատրաստի պրոդուկտ:

Փուլը գլխավորել է վենչուրային կապիտալի Greenoaks Capital Partners ընկերությունը, որը ներդրել է 500 մլն դոլար: Financial Times-ին աղբյուրները հայտնել են, որ Lightspeed Venture Partners-ը եւ Andreessen Horowitz-ը նույնպես մասնակցել են ֆինանսավորմանը:

Գործարքն ընդգծում է ներդրողների հետաքրքրությունը AI ստարտափների նկատմամբ, որոնց աջակցում են հայտնի հետազոտողները կամ տաղանդավոր ինժեներները։
Իլյա Սուցկվերը OpenAI-ի համահիմնադիրն է։ Նա հեռացել է ընկերությունից 2024 թվականի մայիսին եւ հունիսին գործարկել Safe Superintelligence-ը նախկին OpenAI հետազոտող Դենիել Լեւիի եւ Apple AI նախկին ղեկավար Դենիել Գրոսի հետ:

Ստարտափը մշակում է «անվտանգ գերբանականություն»: Կառույցը կոմերցիոն է, բայց եկամուտ չունի եւ չի էլ ակնկալվում. ընկերությունը նախատեսում է մի քանի տարի ծախսել հետազոտության եւ մշակման վրա նախքան պատրաստի պրոդուկտի թողարկումն ու դրամայնացումը:

2024 թվականի սեպտեմբերին Safe Superintelligence-ը 1 միլիարդ դոլարի ֆինանսավորում է ստացել NFDG, a16z, Sequoia, DST Global եւ SV Ange ընկերություններից: Այն ժամանակ ընկերությունը գնահատվում էր 5 միլիարդ դոլար:

2025 թվականի փետրվարին Reuters-ի աղբյուրները հայտնել են, որ Safe Superintelligence-ը նախատեսում էր ստանալ 20 միլիարդ դոլարի գնահատում: Ներդրումային բանակցությունների ընթացքում ընկերության արժեւորումը հասել է 30 միլիարդ դոլարի: