Արցախում անվտանգ հաղորդակցության համար գործարկվել է ArtsakhX-ը

ArtsakhX հավելվածը, որը նախատեսված է Արցախում կայուն եւ անվտանգ հաղորդակցության համար, արդեն հասանելի է ներբեռնելու համար։   

ArtsakhX հավելվածի միջոցով օգտատերերը կարող են ամբողջությամբ՝ սկզբից մինչեւ վերջ (End-to-End) գաղտնագրված ձեւով միմյանց փոխանցել անձնական հաղորդագրություններ, ֆայլեր, կատարել աուդիո եւ տեսազանգեր: ArtsakhX-ում տվյալները չեն պահպանվում սերվերների վրա, ինչը հնարավորություն է տալիս խուսափել հաքերային հարձակումներից։

«Տվյալների ցածր օգտագործման ռեժիմը» թույլ է տալիս հաղորդակցվել նույնիսկ ցածր թողունակությամբ, ոչ կայուն եւ նույնիսկ աշխարհից անջատված համացանցի բացակայության դեպքում։ Նշված համակարգի աշխատունակությունն ապահովելու համար պարտադիր է ունենալ Wi-Fi կամ բջջային տվյալների կապի հասանելիություն։ Այսինքն՝ այն կգործի նաեւ Արցախից դուրս կապի խափանման, ընդհատման դեպքում։

ArtsakhX-ն ունի հետեւյալ գործառույթները՝

•    գաղտնագրված տեքստեր, ֆայլեր, ձայնային զանգեր եւ տեսազանգեր;
•    խմբային զրույցներ, բարձր որակի աուդիո եւ տեսազանգեր;
•    ինտերնետ տրաֆիկի խնայողություն՝ «Տվյալների ցածր օգտագործման ռեժիմի» կիրառմամբ;
•    հնարավորություն շփվել նույնիսկ ցածր թողունակությամբ կամ տատանվող ինտերնետ կապի պարագայում;
•    պետական մարմիններից հրատապ ու նպատակային ծանուցումներ ստանալու հնարավորություն:

Օգտատերերը կարող են ներբեռնել եւ օգտագործել հավելվածը Google Play-ից, App Store-ից կամ ArtsakhX-ի պաշտոնական կայքից՝ գրանցվելով միայն արցախյան բջջային հեռախոսահամարով։