Անվճար սնունդից մինչեւ մերսումներ․լավագույն արտոնությունները, որ վայելում են տեխնոհսկաների աշխատակիցները

Ժամանակին տեխնոլոգիական ընկերությունները նախքան ոլորտի կրճատումերը առատաձեռն արտոնություններ էին տրամադրում իրենց անձնակազմին։

Ծախսերի կրճատման միջոցառումները, սակայն, ստիպել են որոշ տեխնոլոգիական ընկերությունների կրճատել աշխատակիցների արտոնությունները: Գրասենյակային մի քանի լավագույն առավելություն, որ վայելել են նրանք վերջին տարիներին:

Խոշոր տեխնոլոգիական ընկերությունները, ինչպիսիք են Google-ը եւ Meta-ն, փորձել են կրճատել ծախսերը՝ հրաժարվելով բոնուսներից եւ սահմանափակելով աշխատանքային ճանապարհորդությունները: Նրանք նաեւ ազատել են հազարավոր աշխատողների:

Google-ը վճարել է իր աշխատակիցներին դահուկ քշելու համար

Google-ը նախկինում իր աշխատակիցներին նվիրում էր դեպի Վերմոնտ ուղեւորություններ դահուկներով սահելու համար:

Ըստ ինժեներ Զաք Բոուլինգի, ով վերջերս է աշխատանքից ազատվել 8 տարի ընկերությունում աշխատելուց հետո, Google-ը թիմերի համար մի քանի տարի առաջ ուներ «զվարճանքների բյուջեներ»: Թիմերին թույլ է տրվել գումար ծախսել թիմբիլդինգի, ալկոհոլի կամ գրասենյակի համար սառնարանի վրա:

Google-ը հայտնի է նաեւ, որ իր գրասենյակներում ունի մարզադահլիճներ եւ մերսողներ:

Դատական փաստաթղթերի համաձայն՝ 27 մերսող թերապեւտ ազատ է արձակվել աշխատանքից Google-ի Mountain View գրասենյակից, երկուսին բաց են թողել Լոս Անջելեսի կամպուսից եւ մեկական՝ Սան Բրունոյում եւ Իրվինում:

Մեկ այլ բացառիկ արտոնություն Google-ից։ Ընկերությունը ֆինանսական օգնություն է առաջարկել մահացած աշխատողների ամուսիններին։ 2016-ին Forbes-ը հայտնել էր, որ եթե աշխատակիցը մահանա Google-ում աշխատելիս, տեխնոլոգիական ընկերությունը կօգնի հոգ տանել նրանց ընտանիքի մասին:

Համաձայն զեկույցի, որը ստացվել է Glassdoor-ից, Google-ը կշարունակի մահացած աշխատակցի ամուսիններին կամ կանանց վճարել 10 տարվա աշխատավարձի կեսը՝ գումարած յուրաքանչյուր երեխայի համար ամսական հավելյալ 1000 դոլար:

Նշենք, որ գործադիր տնօրեն Սունդար Պիչայը հունվարին հայտարարել էր, որ աշխատանքից ազատում է մոտ 12,000 աշխատակցի: Ինչպես նաեւ, արտոնությունները կրճատվել են եւ ընկերությունը հետաքրքրված չէ դրանցով։

Twitter-ի էքստրավագանտ լանչերը

Իլոն Մասկի կողմից Twitter-ի ձեռքբերումը տխրահռչակ է դարձել ծախսերի կտրուկ կրճատմամբ: Մասկը կրճատել է հազարավոր աշխատակիցների, վաճառել Twitter-ի ունեցվածքը եւ կրճատել մնացած աշխատակիցների նպաստները:

Մասկի վաղ կառավարման ամիսներին նվազեցված արտոնություններից մեկը Twitter-ի անվճար սնունդն էր, որի մեկ չափաբաժինը, ըստ նրա, ընկերության համար արժենում էր 400 դոլար։

Twitter-ի անվճար սնունդն ու խմիչքը անցնում էր «մասնակի վճարովի» մոդելի: Նոյեմբերին Twitter-ի աշխատակիցներից մեկը The New York Times-ին ասել էր, որ ճաշարանը առաջարկել է երկու տեսակի մակարոն եւ պանիր, նաեւ աղցանի բար, սակայն բացակայում են նախկին սննդատեսակները, օրինակ, խորոված ծովախեցգետինը:

Apple-ը կազմակերպել է փոփ աստղերի մասնավոր համերգներ

Apple-ն իր աշխատակիցների համար կազմակերպել է հաճախակի խնջույքներ ու երեկույթներ, որոնց ժամանակ աշխատակիցներին հյուրասիրել են անվճար գարեջուր եւ սնունդ։ Ընկերությունը երբեմն մասնավոր համերգներ է կազմակերպել հայտնի արտիստների մասնակցությամբ, ինչպիսիք են Maroon 5-ը, Դեմի Լովատոն, Գվեն Ստեֆանին եւ այլք:

Apple-ը միակ խոշոր տեխնոլոգիական հսկան է, որը խուսափել է զանգվածային կրճատումներից:

Airbnb-ն աշխատակիցներին վճարում է ճանապարհորդելու համար

Airbnb-ն յուրաքանչյուր աշխատակցի ամեն տարի 2000 ԱՄՆ դոլարի չափով ճամփորդական վարկ է տրամադրում:

Բոնուսը վճարվում է եռամսյակային կտրվածքով եւ կարող է օգտագործվել աշխարհի ցանկացած կետում Airbnb-ի հարթակում կացարաններ ամրագրելու համար: Ընկերությունը նախորդ տարի հայտարարել էր, որ թույլատրվում է իր աշխատակիցներին աշխարհի ցանկացած վայրից աշխատանքը կազմակերպել:

Meta-ն տրամադրում է առողջապահական ծառայություններ հենց գրասենյակում

Meta-ն ատամնաբուժական եւ առողջապահական ծառայություններ է տրամադրում Կալիֆոռնիայի իր կենտրոնական գրասենյակի աշխատակիցներին: Ընկերությունը, որը 2022-ի նոյեմբերին աշխատանքից ազատել է իր աշխատուժի 13%-ին, համագործակցում է Crossover Health-ի հետ՝ Մենլո այգում առողջության կենտրոն ստեղծելու համար: Meta-ն Apple-ի հետ միասին վճարում է նաեւ իրենց կին աշխատակիցների ձվաբջիջների սառեցման ծախսերի մի մասը:

Այնուամենայնիվ, Meta-ն դեկտեմբերին հայտնել է, որ ծրագրում է կրճատել իր Life@ փաթեթը, որը ծածկում էր հոգեկան առողջության ծախսերը եւ աշխատանքի ու կյանքի հավասարակշռության կարիքները: Ընկերությունը չեղյալ է հայտարարել նաեւ Lyft-ի սուբսիդիան. աշխատակիցներն այլեւս Lyft-ի անվճար երթուղիներից չեն կարող օգտվել:

Asana-ի աշխատավայրի 10 000 դոլարանոց կահավորումը

Ըստ ԶԼՄ-ների, Asana-ի աշխատակիցները կարող են իրենց թույլ տալ գրասենյակային շքեղ կահույք, նորագույն համակարգիչներ՝ ընկերության կողմից հատկացված $10,000-ի չափով նպաստի շնորհիվ:

Ամերիկյան ծրագրային ապահովման ընկերությունն աշխատակիցներին առաջարկում է նաեւ օրական երկու անգամ տնական օրգանական կերակուրներ: