Կարեն Վարդանյանի անվան «դրոնների օդանավակայան» կառուցելու նպատակով դրամահավաք է սկսվել

Առաջատար տեխնոլոգիաների ձեռնարկությունների միությունը (UATE) եւ Կարեն Վարդանյանի անվան կրթական հիմնադրամը՝ Ստարտափ Արմենիա հիմնադրամի աջակցությամբ, մեկնարկել են դրամահավաք՝ Կարեն Վարդանյանի անվան «դրոնների օդանավակայան» կառուցելու նպատակով։

«Համապարփակ ինժեներական կրթության՝ հատկապես ԱԹՍ-ների նախագծման եւ կիրառման ոլորտում կրթական հնարավորությունների կազմակերպումը ձեռք է բերել օրհասական բնույթ։ Համալիրի կառուցումն իր ենթակառուցվածքներով ավարտին հասցնելու համար ֆինանսական ներդրումների անհրաժեշտություն է առաջացել, ուստի ակնկալում ենք ձեր աջակցությունը, որպեսզի Հայաստանում միասին հիմնենք կրթական եւ արտադրական ԱԹՍ-ների առաջին օդանավակայանը»,- հայտնել են Կարեն Վարդանյանի անվան կրթական հիմնադրամից։

Լոռու մարզի Լեռնապատ գյուղում այժմ կառուցվող ԱԹՍ թռիչքուղու նախագծի իրականացման համար անհրաժեշտ է $110 հազար։

Թռիչքուղին հետագայում կարող է դառնալ ամբողջական ԱԹՍ օդանավակայան եւ ծառայել որպես Հայաստանում գործող եւ ապագայում մեկնարկվող ԱԹՍ խմբակների եւ մասնագիտական ընկերությունների կենտրոն, որտեղ պատանիներին կփոխանցվեն համապարփակ ինժեներական գիտելիքներ եւ անհրաժեշտ գործնական հմտություններ։