Գիտության կոմիտեն «Բնական գիտություններ» ու «Ճարտարագիտություն և տեխնոլոգիա» բնագավառներում երկակի նշանակության ծրագրերի աջակցության մրցույթ է հայտարարել։
Դրամաշնորհները կտրամադրվեն 12 կամ 24 ամիս տևողությամբ, 4-6 անձից բաղկացած գիտական խմբերին, հետևյալ մասնագիտություններով հետազոտությունների իրականացման համար.
Ինֆորմատիկա և համակարգչային գիտություններ,
Ֆիզիկա և աստղագիտություն,
Քիմիա,
էլեկտրատեխնիկա, էլեկտրոնիկա, էներգետիկա, համակարգչային և տեղեկատվական տեխնոլոգիաներ,
Մեխանիկա,
Մեքենագիտություն և մեքենաշինություն,
Քիմիական տեխնոլոգիաներ,
Նյութագիտություն,
Նանոտեխնոլոգիա:
Գիտական փորձաքննության հետ մեկտեղ՝ հայտերը տրամադրվելու են նաև ՀՀ ԲՏԱ նախարարության ռազմարդյունաբերության կոմիտեին՝ նախագծերի՝ ռազմարդյունաբերական կարիքների համար կարևորությունն ու նպատակահարմարությունը գնահատելու համար:
Թեմայի ֆինանսավորման առավելագույն չափը յուրաքանչյուր տարվա (12-ամսյա կտրվածքով) համար նախատեսված է 20 մլն դրամ: Խմբի անդամների աշխատանքի ամսական վարձատրության միջին հաշվարկային չափը մինչև 150 հազար դրամ է։
Մրցույթին հայտ կարելի է ներկայացնել կոմիտեի մրցույթների հայտերի և հաշվետվությունների ընդունման համակարգով: Հայտերի ընդունման վերջնաժամկետը 2021 թ. հուլիսի 2-ն է (առձեռն պահանջվող փաստաթղթերը կընդունվեն մինչև հուլիսի 9-ը):
