Դիմիտրիյ Չումակը եւ Յուլիա Մոկրոուսովան դասախոսել են Beeline Ստարտափ Ինկուբատորում

Beeline Ստարտափ Ինկուբատորում վարպետության դաս են անցկացրել հանրային ելույթների մարզիչ, ռադիո եւ հեռուստահաղորդավար Դիմիտրիյ Չումակը եւ «Մալեն» դիզայնի, մարքեթինգի եւ բրենդինգի ստուդիայի ղեկավար Յուլիա Մոկրոուսովան։

Դիմիտրիյ Չումակը դասավանդում է Մոսկվայի Մեզենցեւի անվան լրագրողների տանը, սովորեցնում է ճիշտ ելույթ ունենալ ներդրողների առջեւ եւ բանակցություններ վարել։ Beeline Ստարտափ Ինկուբատորի մասնակիցներին նա օգնել է հաղթահարել վախը՝ հանդիսատեսի հետ աշխատելիս, ստանալ դրական էներգիա սեփական ելույթից եւ փոխանցել այն ներկաներին, խոսել գեղեցիկ, վստահ եւ հասնել անհրաժեշտ արդյունքին։

Յուլիա Մոկրոուսովան, ով աշխատել է ավելի քան 1000 ստարտափների հետ, ինկուբատորում ներկայացրել է իր մշակած «Վաճառքների փաթեթավորման» տեխնիկան, որը ներառում է վաճառքի գործիքներ եւ քայլեր։

«Ինկուբատորում մեր նպատակն է թիմերին լիարժեք պատրաստել ներդրողների առջեւ ներկայանալու համար։ Անկախ նրանից թե որքան լավն է քո առաջարկը, այն պիտի կարողանաս գեղեցիկ ներկայացնել։ Մեր բոլոր թիմերի առաջարկներն ի սկզբանե հիանալի են, եւ մեր դասընթացների ժամանակ նրանք զարգացնում են թե իրենց պրոդուկտները, թե սեփական գիտելիքներն ու հմտությունները»,- նշել է Հայաստանում Beeline-ի գլխավոր տնօրեն Անդրեյ Պյատախինը։

Ռեզիդենտ ստարտափներն ինկուբատորում անցնում են 4-ամսյա ինկուբացիոն շրջան, որի ընթացքում ունենում են թրենինգներ, մասնավորապես՝ մարքեթինգի, PR-ի, շուկայի գնահատման, նպատակների գնահատման եւ թիմի ձեւավորման ու զարգացման թեմաներով, ուսումնասիրում են իրավական դաշտի, ֆինանսական պլանավորման եւ գումարների ներգրավման հնարավորությունների հետ կապված հարցեր։