14:55 | 03.07.18 | Նորություններ | 12792

Հայտնի են Climate Tech հաքաթոնի հաղթողները

Ամփոփվել են հունիսի 30-ից հուլիսի 1-ը կայացած Climate Tech երկօրյա հաքաթոնի արդյունքները:

Հաքաթոնը կազմակերպել էին ՄԱԿ-ի Զարգացման ծրագրի անտառային եւ դաշտային հրդեհների կառավարման ծրագիրը՝ ՄԱԶԾ ԻմփաքթԷյմ վենչուրային աքսելերատորի եւ Նորարարական լուծումների եւ տեխնոլոգիաների կենտրոնի հետ համատեղ:

Հաքաթոնին մասնակցել է 9 թիմ:

Լավագույն լուծում գյուղատնտեսության համար ($2000) մրցանակը համատեղ շնորհվել է Smart City եւ Forest Berg խմբերին:

Smart City-ն ջերմոցի ավտոմատ կառավարման համակարգ է:

Forest Berg-ն անտառների եւ գյուղատնտեսության մեջ խելացի մոնիթորինգի համակարգ է, որը թույլ է տալիս պաշտպանել տարածքները հրդեհներից, ապօրինի ծառահատումներից եւ որսից։

Լավագույն լուծում անտառային տնտեսության համար ($2000) մրցանակը հանձնվել է Datathon խմբին:

Ստարտափը մշակել է համակարգ, որի նպատակը հրդեհներին արագ արձագանքումն է: Համակարգը վերցնելով տվյալներ անտառի առանձնահատկությունների մասին եւ համադրելով առկա մետեո պայմանների հետ, թույլ է տալիս կանխատեսել, թե տվյալ անտառի տարբեր կետերում հրդեհ սկսելու դեպքում ինչպես այն կտարածվի:

Ամենանորարարական գաղափար ($1000) մրցանակին արժանացել է Baskcleaner ստարտափը:

Ստարտափը նախագծել է սարք, որը թույլ է տալիս մաքրել լճում առկա մակերեսային աղբը:

Հաքաթոնի կազմակերպիչ, Անտառային եւ դաշտային հրդեհների կառավարման ծրագրի տեխնիկական առաջադրանքի ղեկավար Վարդան Մելիքյանն Itel.am-ի հետ զրույցում ասել է, որ հաքաթոնն իր տեսակի մեջ առաջինն է Հայաստանում՝ ուղղված կլիմայի փոփոխության հետեւանքով անտառային եւ գյուղատնտեսական ոլորտներում առկա մարտահրավերներին դիմակայելու նորարարական լուծումների ստեղծմանը։

photo © Climate Tech

Նա տեղեկացրել է, որ հաղթող թիմերը մոտ ապագայում կընդգրկվեն Կլիմայի փոփոխության տեխնոլոգիաների աքսելերացիոն նոր ծրագրում:

Նշենք, որ հաքաթոնին նախորդել էր մայիսին կազմակերպված կլիմայական տեխնոլոգիաների թինքաթոնը (Climate Tech Thinkathon), որն օգնել է ոլորտների փորձագետների հետ միասին որոշել հիմնական մարտահրավերները, որոնք էլ դարձել են հաքաթոնի քննարկման առարկա:

Climate Tech հաքաթոնն իրականացվել է Կլիմայի փոփոխության տեխնոլոգիական աքսելերատորի շրջանակում, որը Ռուսաստանի կողմից ֆինանսավորվող «Հայաստանում անտառային հրդեհների կառավարման կարողությունների բարձրացման միջոցով կլիմայական փոփոխությունների հետեւանքով առաջացած խնդիրների լուծում» ծրագրի հիմնական բաղադրիչներից մեկն է: