Global Game Jam Armenia 2018 խաղերի հաքաթոնին 11 թիմ է մասնակցել

Հունվարի 28-ին Երեւանում ամփոփվել է Global Game Jam Armenia 2018 խաղերի հաքաթոնը, որը կազմակերպվում է արդեն երկրորդ անգամ:

Noor Games-ի, ԻՏՁՄ-ի եւ Հայաստանի ամերիկյան համալսարանի Ձեռներեցության եւ նորարարական տեխնոլոգիաների կենտրոնի կազմակերպած 48-ժամանոց հաքաթոնին մասնակցել է 11 թիմ:

photo © Լուսանկարը՝ Նառա Գրիգորյանի

Itel.am-ի հետ զրույցում հաքաթոնի համակազմակերպիչ Նարեկ Աղեկյանը նշել է, որ անցած տարվա համեմատ կրկնակի ավելացել է մասնակիցների թիվը՝ շուրջ 65 հոգի:

«Հաքաթոնի ավարտին ներկայացվել են խաղերի նախատիպերը: Հուսով ենք, որ որոշ թիմեր կշարունակեն իրենց գաղափարների զարգացումը եւ խաղերը վերջնական տեսքի կբերեն: Այս տարվա առանձնահատկություններից էր այն, որ թիմերի հետ աշխատում էին 15 մենթորներ: Թիմերը նրանցից խորհուրդներ են ստացել խաղերի լսարանը հասկանալու, գրավիչ էլեմենտներ ստեղծելու եւ շատ այլ հարցերում: Մենթորները նպաստում էին նրան, որ ոչ միայն 48 ժամերը արդյունավետ անցնեն, այլեւ հետագայում պոտենցիալ ունեցող խաղերը ուղղորդվեն դեպի շուկա»,- պատմել է Նարեկ Աղեկյանը:

Նարեկ Աղեկյանը
photo © Լուսանկարը՝ Նառա Գրիգորյանի

Որպես մեծ ներուժ ունեցող խաղ նա առանձնացրել է Salvos board խաղը:

«Խաղը պատրաստ էր արդեն հաքաթոնի առաջին օրը: Յուրահատուկ գաղափար ուներ:  Թիմի անդամներից երկուսը հաքաթոնին նաեւ անցած տարի էին մասնակցել: Թիմը, ընդհանուր առմամբ, 6 հոգուց է բաղկացած: Ուսանողներ են, որոնց մի մասն արդեն աշխատում է»,- նշել է Նարեկ Աղեկյանը:  

photo © Լուսանկարը՝ Նառա Գրիգորյանի

Հիշեցնենք, որ Global Game Jam Armenia 2017-ին մասնակցում էր 5 թիմ (30 մասնակից):

Global Game Jam Armenia-ն միջազգային Global Game Jam հաքաթոնի հայաստանյան միջոցառումն է: 2017թ. ազգային հաքաթոններ են անցկացվել 95 երկրում: