Facebook-ը կնվազեցնի մեդիա-կոնտենտի տեսանելիությունը

Facebook-ի հիմնադիր եւ գլխավոր տնօրեն Մարկ Ցուկերբերգը հաստատել է, որ «մենք սկսում ենք լուրջ փոփոխություններ իրականացնել Facebook- ում»:

«2018 թվականին մեր հիմնական առաջնահերթություններից կլինի երաշխավորելը, որ մարդիկ լավ են անցկացնում իրենց ժամանակը Facebook-ում: Մենք այն ստեղծել ենք, որպեսզի օգնենք մարդկանց մնալ կապի մեջ եւ ավելի սերտորեն կապվել նրանց հետ, ովքեր կարեւոր են մեզ համար: Այդ պատճառով միշտ հիմքում դրել ենք ընկերներին եւ ընտանիքներին: Սակայն վերջին շրջանում օգտատերերից առավել հաճախ ենք լսում, որ հանրային կոնտենտը՝ բիզնեսից, բրենդերից եւ մեդիայից, սկսում է ստվերել անձնական կոնտենտին», - Facebook-ի իր էջում այսօր գրել է Մարկ Ցուկերբերգը:

«Մենք մեզ պատասխանատու ենք համարում նրա համար, որ մեր ծառայությունները նպաստեն մարդկանց բարեկեցությունը: Լուրջ ուսումնասիրություններ ենք կատարել, լսել ենք գիտական հանրության կարծիքը, խոսել ենք համալսարանների առաջատար փորձագետների հետ: Արդյունքները ցույց են տալիս, որ երբ մենք օգտագործում ենք սոցիալական մեդիան՝ մեզ համար թանկ մարդկանց հետ հարաբերվելու համար, դա կարող է նպաստել մեր բարեկեցությանը: Մենք կարող ենք մեզ պակաս միայնակ զգալ եւ երկարաժամկետ հեռանկարում սա կապվում է
երջանկության եւ առողջության ցուցիչների հետ: Մյուս կողմից՝ հոդվածների պասիվ ընթերցումը կամ տեսանյութերի դիտումը՝ անգամ եթե դրանք զվարճալի եւ հետաքրքիր են, կարող է այդքան էլ լավ չլինել: Ուստի մենք մեծ փոփոխություններ ենք սկսում Facebook-ում», - ասել է Ցուկերբերգը:

«Այս ուղղությամբ փոփոխությունները սկսել ենք անցյալ տարի, սակայն մի քանի ամիս կպահանջվի, որպեսզի այս նոր մոտեցումը արտացոլվի մեր բոլոր ծառայություններում: Առաջին փոփոխությունները կտեսնեք News Feed-ում, որտեղ ավելի շատ բան կտեսնեք ձեր ընկերներից, ընտանիքից եւ խմբերից եւ ավելի քիչ՝ բիզնեսից, բրենդերից եւ մեդիայից», - հաստատել է Facebook-ի հիմնադիրը: