17:49 | 25.09.17 | Նորություններ | 78746

Chessify-ը կներկայացնի Հայաստանը Seedstars World-ում

Մայքրոսոֆթ ինովացիոն կենտրոն Հայաստանը՝ ՎիվաՍել-ՄՏՍ-ի հետ համատեղ, Երեւանում կազմակերպել էր Seedstars միջազգային մրցույթի երեւանյան փուլը։

Միջոցառմանը մասնակցել է 11 ստարտափ:

«Այս տարվա միջոցառման մասնակից ստարտափները հաճելիորեն զարմացրեցին, շատերի պրոդուկտները բավականին հղկված էին եւ պատրաստ դուրս գալու միջազգային շուկաներ, շատերը արդեն ունեին նշանակալի ձեռքբերումներ թե՛ ներգրավված ներդրումների, թե՛ թիրախային շուկաներում պրոդուկտի զարգացման առումով։ Կարեւոր եմ համարում ընդգծել նաեւ, որ բոլոր պրոդուկտները միտված էին մեծ ու գլոբալ խնդիրների լուծմանը։ Այս դրական փոփոխությունները եւ զարգացման միտումները հայկական ստարտափ էկոհամակարգի եւ բոլորիս կարեւոր ձեռբերումն է», - նշել է Մայքրոսոֆթ ինովացիոն կենտրոնի տնօրեն Արտաշես Վարդանյանը։

Մրցույթի վերջնական արդյունքներն ու հաղթողի անունը հայտարարել է ժյուրիի անդամ, միջոցառման գլխավոր գործընկեր ՎիվաՍել-ՄՏՍ-ի տեղեկատվական համակարգերի վարչության պետ Թհոմաս Մազեջյանը:

Ժյուրիի որոշման արդյունքում Շվեյցարիայում կայանալիք Seedstars միջազգային մրցույթին Հայաստանը կներկայանա Chessify թիմով, որի ստեղծած արտադրանքն հնարավորություն է տալիս հեռախոսով գրքից նկարել խնդիրը, թվայնացնել ու աշխատել դրա վրա. տեղաշարժել խաղաքարերը, վիզուալ ավելի հեշտ պատկերացնել հետագա քայլերը: Ներկայում այն ունի արդեն 100,000-ից ավել ներբեռնում։

Միջազգային մրցույթում ստարտափը հնարավորություն կունենա պայքարելու $1 մլն-ի չափով մրցանակի համար։

Հայաստանյան փուլի երկրորդ եւ երրորդ տեղերը զբաղեցրել են համապատասխանաբար Inapptics եւ Breedge ընկերությունները։

Մրցույթի տեղական փուլի կազմակերպմանն աջակցել են միջոցառման գլխավոր գործընկեր ՎիվաՍել-ՄՏՍ-ը, Շվեյցարիայի դեսպանատունը Հայաստանում, Նորարարական լուծումների եւ տեխնոլոգիաների կենտրոնը եւ Մայքրոսոֆթ Էր-Էյ ընկերությունը։ Միջոցառման արծաթե գործընկերն է Ամերիաբանկը։