Հայաստանն ու Իրաքը քննարկում են ՏՏ համագործակցության հեռանկարը

ՀՀ տրանսպորտի, կապի եւ ՏՏ նախարարի տեղակալ Բորիս Դեմիրխանյանն ու Իրաքի կապի եւ ենթակառուցվածքների պետական ընկերության (ITPC) գլխավոր տնօրենի պաշտոնակատար Նադիմ Լաֆթա Խաջուր Ալ Էլայաուվին այսօր Երեւանում քննարկել են ՏՏ գործակցության հեռանկարները:

Կողմերը քննարկել են Տեղեկատվության մշակման ազգային կենտրոն (Data center) ստեղծելու երկու երկրների մոտեցումները: Իրաքյան կողմը նշել է, որ հետաքրքրված է ազգային Data center-ի կառուցման ծրագրով եւ այդ ուղղությամբ նախնական քայլեր են արվում:

Բորիս Դեմիրխանյանն էլ ներկայացրել է Հայաստանի տարածքում ինտերնետ ցանցի հասանելիության ցուցանիշները, օպերատորների աշխատանքը, ներդրվող նոր տեխնոլոգիաները: Նադիմ Լաֆթա Խաջուր Ալ Էլայաուվին իր հերթին ընդգծել է, որ պատվիրակության այցի նպատակը հենց այս ոլորտում համագործակցության եզրեր գտնելն ու Հայաստանում կայացած ենթակառուցվածքների վերաբերյալ փորձի փոխանակումն է:

Իրաքյան կողմը հետաքրքրվել է Հայաստանի թվային հեռուստատեսության ներդրման փորձով` հայտնելով, որ պատրաստվում են իրականացնել թվային հեռուստացանցի կառուցման ծրագիր, եւ այս ուղղությամբ հնարավոր է համագործակցություն։