Renderforest-ը կներկայացնի Հայաստանը RISE տեխնո կոնֆերանսում

Տեսանյութերի առցանց պատրաստման Renderforest հարթակը կներկայացնի Հայաստանը Web Summit-ի կազմակերպած`առաջին ասիական տեխնոլոգիական RISE կոնֆերանսում:

Միջոցառումը կանցկացվի հուլիսի 31-ից օգոստոսի 1-ը՝ Հոնկոնգում:

«Ամիսներ առաջ մեզ հետ կապ հաստատեցին RISE կոնֆերանսի կազմակերպիչները եւ հրավիրեցին մասնակցելու Web Summit-ի կողմից Հոնկոնգում կազմակերպվող միջոցառմանը: Renderforest-ին տրամադրելու են ցուցասրահ` Հայաստան անունով, որտեղ մեկ օր շարունակ ներկայացնելու ենք մեր նախագիծը: Ակնկալում ենք հետաքրքրություն ներդրողների եւ ԶԼՄ-ների կողմից»,- Itel.am-ի հետ զրույցում ասել է Renderforest-ի հիմնադիր Նարեկ Սաֆարյանը:

Wildek Entertainment հայկական ընկերության կողմից ստեղծված հարթակում առավելագույնը 10 րոպեում պարզեցված կարգով կարելի է ստեղծել սլայդ շոուներ, բացատրական հոլովակներ, պրոմո տեսանյութեր, բիզնես անիմացիոն վիդեոներ եւ այլն:

Ներկայում Renderforest-ն ունի 15 հազ. օգտատեր եւ 30 հազ. վիդեո: Հարթակն օգնել է շուրջ 500 ստարտափի՝ վիդեոների պատրաստման հարցում:

Renderforest-ի մասին ավելի մանրամասն՝ այստեղ: