Երեւան/Մեդիամաքս/. Հարավային Կորեայում $35 մլրդ-ով կառուցվող Սոնգդո ապագայի քաղաքի հեղինակները այն հագեցնում են այնպիսի ենթակառուցվածքներով, որոնք պետք է որ հետաքրքրեն աշխարհի այլ, այդ թվում՝ Հայաստանի քաղաքների իշխանություններին:
1. Պնեւմատիկ աղբահանություն
Անճոռնի աղբարկղերի եւ աղմկոտ աղբահավաք մեքենաների փոխարեն ամբողջ աղբն ընդունվում է հատուկ մեքենաների կողմից, որոնք ստորգետնյա հատուկ համակարգով ուղղորդում են այն դեպի վերամշակման կայան: Համակարգին միացված են բոլոր շենքերը, աղբահանության համակարգը կառուցված է կոյուղու անալոգիայով:
2. Ընդարձակ ստորգետնյա ավտոկայանատեղեր
Քաղաքի ավտոկայանատեղերի 95%-ը ստորգետնյա է, ինչը տարածք է ազատում կանաչ գոտիների համար:
3. «Խելացի» ջրամատակարարման համակարգ
Սոնգդոն ունի 3 տեսակի ջրամատակարարման ցանցեր, որոնք նախատեսված են տարբեր նպատակների համար, այնպես, որ, օրինակ, խմելու ջուրը չի օգտագործվում ոռոգման կամ զուգարանի համար: Ամեն շենք իր հերթին ունի օգտագործված ջրի վերամշակման եւ երկրորդային օգտագործման համակարգ:
4. Բարձր հստակության վիդեոկոնֆերանսների հնարավորություն
Բոլոր շենքերն ապահովված են հեռահաղորդակցության այնպիսի ցանցով, որը տալիս է բարձր հստակության (high definition) վիդեոկոնֆերանսների հնարավորություն:
5. Բնակարանների եւ շենքերի ավտոմատացում
Սոնգդոյի բնակիչները կարող են կառավարել իրենց բնակարանները բջջային հեռախոսներից եւ համակարգչից, բացել դռները մատնահետքերով եւ այլն:
6. Քաղաքային ենթակառուցվածքները կառավարվում են սենսորներով
Սոնգդոն գերհագեցած է սենսորներով, եւ բազմաթիվ գործողություններ, որոնք մեզանում ենթադրում են ֆիզիկական աշխատանք, այնտեղ կատարվում են սենսորների միջոցով:
7. Ջեռուցում եւ էլեկտրիֆիկացում
Էլեկտրաէներգիան Սոնգդոյում արտադրվում է բնական գազի միջոցով; էլեկտրաէներգիայի արտադրության ժամանակ օգտագործվող ջուրը կիրառվում է ջեռուցման համար:
8. «Խելացի» գլխավոր հատակագիծ
Երբ քաղաքը կառուցվում է զրոյից, նախագծողների մոտ բացառիկ հնարավորություն կա հնարավորինս հարմար կերպով կառուցել տրանսպորտային ցանցը եւ բնակչության խտության բաշխումը: Սոնգդոն այնպես է նախագծված, որ առավել ակտիվ հաճախվող վայրեր հնարավոր լինի հասնել 10-15 րոպեում հեծանվով եւ ավտոմեքենա վարելու անհրաժեշտությունը հասցվի նվազագույնին:
