Երեւան: Մեդիամաքս: “Վիքիպեդիա. դպրոցներ եւ համալսարաններ” նախագծի շրջանակներում Նարեկացի արվեստի կենտրոնում կայացել է “Վիքիպեդիայի հայերեն հոդվածների համալրում” թեմայով տեսական եւ գործնական դասընթացը։
«Մեր նպատակն է վաղ տարիքից ինտերնետ օգտագործողներին սովորեցնել ոչ միայն ստանալ ինտերնետից, այլ նաեւ տալ, ինչի հնարավորությունը տալիս է Վիքիպեդիան եւ նրա քույր նախագծերը՝ Վիքիլսարան, , Վիքիգրքեր, Վիքիբառարան, Վիքիքաղվածք, Վիքիպահեստ» ,- ասել է նախագծի անդամներից՝ Ինստիգեյթ ուսումնական կենտրոնի ծրագրերի համակարգող Արմենուհի Պողոսյանը։
Դասընթացի ժամանակ ներկայացվել են Վիքիպեդիայի հոդվածները խմբագրելու հիմնական գործիքները, նոր հոդվածի ստեղծումը, գոյություն ունեցող հոդվածի ավելացումը, պակասեցումը, համալրումը, սրբագրումը եւ այլն: Զուգահեռ ներկաները փորձել են համալրել հայերեն Վիքիպեդիան նոր հոդվածներով։
«Վիքիպեդիայում աշխատելու հիմունքները մատչելի են։ Պետք է աշխատել, խմբագրել։ Վերջին երեք տարիների ընթացքում աշխատողների ու խմբագրողների թվում դրական տեղաշարժ է նկատվում. եթե երեք տարի առաջ մենք ունեինք 3500 հոդված, այսօր դրանք 25.620-նն են»,-Մեդիամաքս-ի թղթակցին ասել է հայերեն Վիքիպեդիայի ադմինիստրատոր Մհեր Բեքարյանը։ Դասընթացի ժամանակ Վիքիպեդիայի հայերեն հոդվածների թիվն ավելացել է եւս մեկով։
Վիքիպեդիայում հոդված ստեղծելու եւ խմբագրելու մասին առավել մանրամասն կարդացեք այստեղ:
«Վիքիպեդիա. դպրոցներ եւ համալսարաններ» նախագծի հիմնադիրներն են ԿԱԶԱ մարդասիրական հիմնադրամը, ԱՆԱՀԻՏ նախաձեռնությունը, Հայերեն Վիքիպեդիա համայնքի ադմինիստրատորները, Ինֆորմացիոն տեխնոլոգիաների ձեռնարկությունների միությունը, ARAX օպերացիոն համակարգի աշխատանքային թիմը եւ Ինստիգեյթ ուսումնական կենտրոնը։
