13:36 | 10.09.09 | Նորություններ | 2769

Երեւանում համակարգչային 20 խանութներից միայն 4-ն են առաջարկում արտոնագրված ծրագրեր, ասվում է BSA-ի հետազոտության մեջ

Երեւան /Մեդիամաքս/. Երեւանում համակարգիչների վաճառքի 20 կենտրոններից միայն 4-ն են առաջարկում արտոնագրված ծրագրեր:

Ինչպես հաղորդում ՄԵԴԻԱՄԱՔՍ-ը, այդպիսին են Business Software Alliance (BSA) ընկերության կողմից օգոստոսի 12-24-ը անցկացված հետազոտության արդյունքները:

Ինչպես նշել է ընկերության իրավաբան Նարինե Մկրտչյանը, այդ ժամանակահատվածում ընկերության աշխատակիցներն այցելել են համակարգիչների վաճառքի կենտրոններ եւ ներկայացել որպես հաճախորդներ: Յուրաքանչյուր կենտրոն 5 անգամ այցելելու արդյունքում պարզվել է, որ 20 կենտրոններից միայն 4-ում են պարտադիր կերպով առաջարկում արտոնագրված ծրագրեր:

Նարինե Մկրտչյանի կարծիքով, խնդիրն այն է, որ հաճախորդները չեն գիտակցում չարտոնագրված համակարգչային ծրագրեր գնելու հանցավորությունը: “Քաղաքացիները, ովքեր ձեռք են բերում կամ ինտերնետից ներբեռնում են չարտոնագրված ծրագրեր, պոտենցիալ գողեր են”, - նշել է Նարինե Մկրտչյանը:

Նա ընդգծել է նաեւ, որ պետությունը ներկայումս ակտիվորեն զբաղվում է այդ հարցով, մասնավորապես, մտավոր սեփականության հարցերով միջգերատեսչական հանձնաժողովի գործունեությունն ուղղված է նման խնդիրների լուծմանը: