OpenAI-ը ներկայացրել է GPT-5.5 Instant մոդելը ChatGPT-ում

OpenAI-ը ներկայացրել է GPT-5.5 Instant մոդելը ChatGPT-ում, որը կփոխարինի GPT-5.3 Instant-ին որպես լռելյայն մոդել եւ հասանելի կլինի բոլոր օգտատերերին։ 

Ընկերության խոսքով՝ GPT-5.5 Instant-ը արդեն ներդրվել է ChatGPT-ի բոլոր օգտատերերի համար որպես լռելյայն մոդել, ինչպես նաեւ API-ում։ Բաժանորդների համար երեք ամիս պահպանվելու է հասանելիությունը 2026 թվականի մարտին ներկայացված GPT-5.3 Instant-ին։

Ներքին թեստերում GPT-5.5 Instant-ը 52,5%-ով պակաս «հալյուցինացիաներ» է ցուցաբերում՝ համեմատած GPT-5.3 Instant-ի հետ՝ առողջապահության, իրավունքի եւ ֆինանսների թեմաներով հարցումների դեպքում։ Այն նաեւ 37,3%-ով ավելի քիչ սխալներ է թույլ տալիս։

Ընդհանուր առմամբ, թարմացված մոդելն ավելի լավ է կատարում առօրյա խնդիրները, ներառյալ՝ բեռնված պատկերների վերլուծությունը, մաթեմատիկայի, գիտության, տեխնոլոգիաների եւ ինժեներիայի հարցերին պատասխանելը, ինչպես նաեւ ավելի ճշգրիտ է որոշում, թե երբ է պետք օգտագործել վեբ որոնումը՝ ավելի օգտակար պատասխան տալու համար։

Ընկերությունում նշում են, որ պատասխանները դարձել են ավելի հակիրճ եւ ճշգրիտ՝ առանց «ջերմության» եւ անհատականության կորստի։ Մոդելը տալիս է ավելի քիչ ավելորդ ճշգրտող հարցեր, խուսափում է պատասխանները «ծանրաբեռնող» տարրերից (օրինակ՝ անտեղի էմոջիներից) եւ ավելի արդյունավետ է օգտագործում կոնտեքստը։

Ներկայացվել է նաեւ GPT-5.3 Instant եւ GPT-5.5 Instant մոդելների արդյունքների համեմատություն որոշ չափորոշիչներում։