Getty Images եւ Shutterstock ֆոտոբանկերը կմիավորվեն

Getty Images-ը կմիավորվի մրցակից Shutterstock-ի հետ՝ ստեղծելու 3.7 միլիարդ դոլարի արժեք ունեցող պատկերների հսկայական շտեմարան՝ նախատեսված արհեստական բանականության դարաշրջանի համար։

Այն կկոչվի Getty Images Holdings եւ Նյու Յորքի ֆոնդային բորսայում կներկայանա GETY նշանով, ասվում է Getty Images-ի հաղորդագրությունում:

Գործարքը միաձայն հավանության է արժանացել երկու կողմերի տնօրենների խորհուրդների կողմից: Մնում է թույլտվություն ստանալ կարգավորող մարմիններից եւ բաժնետերերից:

Getty Images-ի գործադիր տնօրեն Քրեյգ Փիթերսը կլինի միավորված ընկերության գործադիր տնօրենը: Խորհուրդը կներառի 11 անդամ՝ Փիթերսը, վեցը Getty Images-ից, ինչպես նաեւ երեքը՝ Shutterstock-ից եւ վերջինիս ղեկավար Փոլ Հաննեսին։ Նախագահը կլինի Getty Images-ի տնօրենների խորհրդի ղեկավար Մարկ Գետին։

Getty Images-ի բաժնետերերը կունենան Getty Images Holdings-ի մոտավորապես 54,7%-ը, իսկ Shutterstock-ի բաժնետերերը՝ 45,3%-ը: Վերջինս նաեւ կկարողանա որոշել, թե ինչ անել Shutterstock-ի բաժնետոմսերի հետ՝ փոխանակել դրանք փողի կամ նոր ընկերության բաժնետոմսերի հետ։

Կողմերն ակնկալում են, որ միասին նրանք կկարողանան հասնել ավելի մեծ ֆինանսական արդյունավետության, իրենց օգտատերերին տրամադրել ավելի մեծ գրադարան, իսկ բովանդակության հեղինակներին՝ ավելի լայն լսարան: Զարգացման մեջ ավելի շատ ներդրումներ անելու կարողությունը պետք է գործնական օգուտներ բերի հաճախորդներին եւ շահույթ ներդրողներին:

Shutterstock-ի բաժնետոմսերն աճել են 26,5%-ով նախաշուկայական առեւտրում, իսկ Getty Images-ի բաժնետոմսերը՝ 50,2%-ով, գրում է Reuters-ը։

Getty Images-ը հիմնադրվել է 1995 թվականին, Shutterstock-ը՝ 2003-ին։ 2021-ին Getty Images-ը նաեւ գնել է Unsplash անվճար ֆոնդային լուսանկարչական ծառայությունը: