Dօing Digital 2024 համաժողովի գործընկերներ Fastex-ը, Ucraft-ը եւ Hoory-ն հատուկ մրցանակների են արժանացել

Օրերս կայացած DDF 2024 ամենամյա միջազգային համաժողովի ընթացքում Fastex էկոհամակարգը, Ucraft ընկերությունը եւ Hoory AI օգնականն արժանացել են համաժողովի կազմակերպիչների կողմից սահմանված հատուկ մրցանակների։

Fastex web3 էկոհամակարգը ճանաչվել է լավագույնը բլոկչեյնի նորարարական կիրառման համատեքստում։ Էկոհամակարգն ունի ավելի քան 250 000 օգտատեր եւ ավելի քան 500 գործընկեր ամբողջ աշխարհում, նպաստում է բիզնեսների եւ օգտատերերի միջեւ գործարքային տվյալների նկատմամբ սեփականության մակարդակի բարձրացմանը։  

«Շատ ուրախ եմ, որ Ֆասթեքսը եւս այս տարի միացել է որպես բլոկչեյն գործընկեր, ինչպես նաեւ էկոհամակարգից Ucraft ընկերությունը՝ որպես տեխնոլոգիական գործընկեր: Շատ կարեւորում եմ Hoory-ի մասնակցությունը, որովհետեւ արհեստական բանականությունից շատ ենք խոսելու, այո՛, իհարկե արհեստական բանականության լեզուն անգլերենն է, բայց մենք եւս որպես երկիր, որն ունի իր թվայնացման օրակարգը, պետք է ունենանք նաեւ արհեստական բանականություն, որը խոսում է, հասկանում եւ լուծումներ է առաջարկում հենց մեր մայրենի լեզվով», - ընդգծել է DDF 2024 համաժողովի հիմնադիր, SPRING PR ընկերության համահիմնադիր Տաթեւիկ Սիմոնյանը։

Fastex-ի գործընկեր՝ 2014 թվականին հիմնադրված Ucraft ընկերությունն էլ ճանաչվել է լավագույնը վեբ-դիզայնի միտումները ձեւավորելու գործում։ Վայելելով 360 000 ակտիվ օգտատերերի վստահությունն ամբողջ աշխարհում՝ Ucraft-ը տրամադրում է հեշտ կիրառելի վեբ-գործիքակազմ, որպեսզի անհատներն ու ձեռնարկությունները նվազագույն ջանքերի գործադրմամբ խթանեն ու կառավարեն իրենց առցանց ներկայությունը եւ գործունեությունը։



Հայերեն հաղորդակցման համար մրցանակի է արժանացել նաեւ Hoory արհեստական բանականությամբ աշխատող օգնականը, որը կարողանում է բիզնեսների եւ անհատների փոխարեն AI զրույցներ վարել՝ սպասարկման գործընթացն ավտոմատացնելու եւ հաճախորդների մեծածավալ հարցումներին արագ պատասխանելու նպատակով։

DDF 2024-ի հովանավոր հանդիսացող Fastex-ի գործադիր տնօրեն Վախթանգ Աբրահամյանը համաժողովի ընթացքում մասնակցել է «Ֆինանսների ապագան» խորագրով պանելային քննարկմանը, որի մոդերատորն աշխարհահռչակ ֆուտուրիստ, բազմաթիվ բեսթսելերների հեղինակ, Moven-ի հիմնադիր Բրեթ Քինգն էր։

«Ֆասթեքսն արդեն մեծ աշխարհագրական տարածում ունի. Հոնգ Կոնգից մինչեւ Եվրոպա, Միացյալ Արաբական Էմիրություններ: Շատ կարեւոր է, որ Հայաստանում եւս ձեւավորվի համապատասխան բարենպաստ միջավայր, որպեսզի այնպիսի բիզնեսն ինչպես Ֆասթեքսն է, շահագրգռված լինի ներկայացված լինելու Հայաստանում: Վստահ եմ, որ այդ ուղղությամբ աշխատանքներ արդեն իսկ գնում են, գիտեմ, որ մոտ ապագայում ականատես կլինենք Ֆասթեքսի մուտքին հայաստանյան շուկա», - ասել է Fastex-ի գործադիր տնօրեն Վախթանգ Աբրահամյանը։

Թվային փոխակերպմամբ եւ թվային տնտեսության զարգացմամբ հետաքրքրված ունկնդիրները «Թվային տնտեսություն։ Բացահայտելով գեներատիվ արհեստական բանականությունը» պանելային քննարկման ընթացքում ծանոթացել են նաեւ Ucraft-ի եւ Hoory-ի հիմնադիր տնօրեն Գեւորգ Բալյանի տեսլականին։

«Դրիմ պլատֆորմը, որտեղ Ucraft-ն ու Hoory-ն մաս են կազմում, նաեւ Fastexverse-ը, նորարարական լուծումներ են տալիս բիզնեսներին։ Կարծում եմ, որ գոնե 1-ից 2 տարվա ընթացքում լիքը հայկական բիզնեսներ կներդնեն AI-ը իրենց բիզնեսում, կխթանեն եւ կվարեն օնլայն e-commerce Ucraft-ի միջոցով եւ՛ օնլայն, եւ՛ օֆլայն մետավերսում», - նշել է Գեւորգ Բալյանը։

Այս տարի DDF-ը հյուրընկալել էր 20-ց ավելի միջազգային խոսնակի ՀՀ Կենտրոնական բանկից, Հայաստանի տեղեկատվական համակարգերի գործակալությունից, Սինգապուրի սոցիալական գիտությունների համալսարանից, Հայաստանի Ամերիկյան համալսարանից, Visa-ից, Deloitte-ից, ICDT Global-ից, Moven-ից, Just Better-ից, People Growth Organization-ից, Ամերիաբանկից, ArCa-ից, Ucom-ից, Balchug Capital-ից, Apricot Capital-ից, Fastex-ից, Ucraft-ից եւ Hoory-ից։