Քվանտային եւ մեզոսկոպիկ ֆիզիկայի մագիստրոսական կրթական ծրագիր կգործի

«Իմ քայլը» հիմնադրամը նախաձեռնել է «Quanta» քվանտային եւ մեզոսկոպիկ ֆիզիկայի մագիստրոսական կրթական ծրագիրը:

Հիմնադրամից հայտնում են, որ «Quanta» ծրագրի շրջանակներում մագիստրատուրա ընդունվածները կունկնդրեն արտասահմանյան առաջադեմ բուհերի հայազգի գիտնականներին:

«Յուրաքանչյուր մագիստրոս ուսման ընթացքում կունենա իր գիտական ղեկավարը, ում հետ կիրականացնի գիտահետազոտական աշխատանք՝ նախապատրաստելով մագիստրոսական ատենախոսությունը, որը հետագայում կտպագրվի գիտական հոդվածի տեսքով:

Ծրագրի ուսուցումը  ամբողջապես կլինի անվճար, ընդունված ուսանողների ուսման վարձը կհոգա հիմնադրամը: Ծրագրին կարող են մասնակցել ֆիզիկայի, քիմիայի, մաթեմատիկայի, ճարտարագիտության եւ տեղեկատվական տեխնոլոգիաների բնագավառում առնվազն բակալավրի որակավորում ստացած մասնագետները, որոնք ունեն անգլերենի շեմային մակարդակ», - ասված է հիմնադրամի հաղորդագրության մեջ:

Մարտի 19-ին ժամը 14:00-ին «Հոլիդեյ Ինն» Երեւան-Հանրապետության Հրապարակ հյուրանոցում («Երեւան» սրահ, հասցե՝ Ամիրյան 2) ղեկավար թիմը կներկայացնի «Quanta» ծրագիրը եւ դրան վերաբերող մանրամասները: