Ռոբին ռոբոտին ստեղծած ընկերությունը 2 միլիոն դոլարի ներդրում է ներգրավել Հայաստան

Արհեստական բանականության վրա հիմնված Ռոբին ռոբոտին ստեղծած Expper Technologies ընկերությունը 2 միլիոն դոլարի ներդրում է ներգրավել Հայաստան՝ Starta VC եւ Formula VC վենչուրային ընկերությունների միջոցով։

Բացի SmartGateVC-ից, եւ հրեշտակ ներդրողներից, ընկերության նոր ներդրողներն են նաեւ Healthcare Equity Angels-ը, AiSprouts VC-ը, AngelsDeck-ը։

Ռոբինի առաքելությունն է օգնել հիվանդանոցային բուժում ստացող երեխաներին հաղթահարել սթրեսը եւ ավելի թեթեւ դարձնել բուժման ընթացքը։ Ապաքինման փուլում գտնվող երեխաներին Ռոբինն օգնում է գունավորել հիվանդանոցային միջավայրը։

Ֆինանսավորումից ստացված հասույթը կօգտագործվի Ռոբինի տեխնոլոգիայի առաջխաղացման, ինչպես նաեւ թիմի ընդլայնման համար։

«Մենք ուրախ ենք ողջունել մեր ներդրողներին մեզ հետ կիսելու այս կարեւոր ճանապարհը: Ներդրված ֆինանսները մեզ թույլ կտան շարունակել իրականացնել մեր առաքելությունը՝ որակյալ խնամքը հասանելի դարձնելու բոլորին եւ շուկա բերելու նոր սերնդի խնամող ռոբոտներ»,- նշել է ընկերության համահիմնադիր եւ գործադիր տնօրեն Կարեն Խաչիկյանը։

Վերջերս Ռոբին ռոբոտը ճանաչվել էր հեղինակավոր TIME ամսագրի 2021 թվականի լավագույն նորարարություն։