Քննարկվել է «1991 ստորաբաժանում» ծրագիրը պետական հիմքի վրա դնելու հարցը

Հայաստանի գիտության եւ տեխնոլոգիաների հիմնադրամի (FAST) գլխավոր գործադիր տնօրեն Արմեն Օրուջյանը կարեւորել է «1991 ստորաբաժանում» ծրագիրը պետական ինստիտուցիոնալ հիմքերի վրա դնելու անհրաժեշտությունը:

ԿԳՄՍ նախարարությունից հայտնում են, որ Արմեն Օրուջյանն այդ մասին ասել է նախարար Վահրամ Դումանյանի, նախարարի տեղակալներ Ժաննա Անդրեասյանի ու Կարեն Թռչունյանի հետ հանդիպմանը:

Ժաննա Անդրեասյանն առաջարկել է քննարկել  հանրակրթության ավագ աստիճանում «1991 ստորաբաժանում» ծրագրի՝ հիմնադրամի կողմից իրականացվող նախապատրաստական դասընթացները  որպես արտադասարանական խմբակ ընդգրկելու հնարավորությունը:  Նախարարի տեղակալը  նշել է, որ ԲՏՃՄ ( բնագիտություն, տեղեկատվական հաղորդակցական տեխնոլոգիաներ, ճարտարագիտություն, մաթեմատիկա) ուղղության զարգացումը դրված է նաեւ հանրակրթության նոր չափորոշչի հիմքում, եւ այդ նպատակով նախատեսվում է ՀՀ բոլոր դպրոցներում հիմնել բնագիտական լաբորատորիաներ, որոնք կարող են նպաստել առաջարկվող ծրագրի ինտեգրմանը պետական կրթական ծրագրերում:

Վահրամ Դումանյանը նշել է, որ միաժամանակ բարձրագույն կրթության բարեփոխումների համատեքստում քննարկվում է տարկետման համակարգը ռազմական կրթության հետ փոխկապակցելու մոդելների մշակման հարցը: Բոլոր բարեփոխումների եւ նախագծերի հիմքում գերակա են բնագիտական, տեխնոլոգիական եւ ճարտարագիտական ուղղությունների զարգացումը կրթության եւ գիտության բոլոր աստիճաններում: