Alibaba-ն COVID-19-ի ֆոնին խոշոր ներդրումներ կանի ամպային ենթակառուցվածքներում

Alibaba Group Holding չինական ընկերությունը $28 մլրդ կներդնի սեփական ամպային ենթակառուցվածքների զարգացման ուղղությամբ՝ առաջիկա երեք տարիների ընթացքում:

Նման որոշումը պայմանավորված է նրանով, որ կորոնավիրուսի բռնկման ֆոնին Չինաստանի կոմերցիոն հատվածում կտրուկ աճել է ամպային ենթակառուցվածքների պահանջարկը:

Նշվում է, որ Չինաստանում այս տարվա փետրվարին հեռավար աշխատանքի անցած մարդիկ կազմել են մեծամասնություն, ինչի պատճառով Alibaba-ի ծառայությունների պահանջարկը կտրուկ աճել է: Սա վերաբերում է նաեւ ընկերության պրոդուկտներից DingTalk-ին, որն օգտագործում են ինչպես գրասենյակներում, այնպես էլ կրթական հաստատություններում:

Ամպային ենթակառուցվածքները Alibaba-ի ամենաարագ աճ գրանցող ուղղություններից է: Ինչպես նշել է Alibaba Cloud Intelligence-ի նախագահ Ջեֆ Չժանը, համավարակը ստեղծել է լրացուցիչ լարվածություն՝ տնտեսության բոլոր ոլորտներում, սակայն իրենք հույս ունեն, որ ներդրումները կօգնեն ձեռնարկություններին արագացնել վերականգնման գործընթացը: