Microsoft-ը պատրաստ է $1 մլրդ ներդնել ԱԲ հետազոտություններում

Microsoft-ը $1 մլրդ կներդնի OpenAI կազմակերպությունում, որը զբաղվում է արհեստական բանականության (ԱԲ) առաջադեմ հետազոտություններով:

The New York Times-ի տվյալներով, լաբորատորիայի վերջնական նպատակն է արհեստական ընդհանուր բանականության համակարգի (AGI) ստեղծումը, որը կարող է «մտածել» նույն կերպ, ինչ մարդը:

Տարբեր հետազոտություններ փաստում են, որ AGI համակարգերը, որոնք կարողանում են սովորել, մտածել եւ երբեմն անցնել մարդուն՝ ինտելեկտուալ խնդիրների լուծման հարցում, կհայտնվեն տասնամյակներ հետո: OpenAI-ի համահիմնադիրը Սեմ Ալթմանն է, որը նաեւ Y Combinator աքսելերատորի նախագահն է: Նա կարծում է, որ OpenAI-ը կուտակված փորձը կարող է ներդնել՝ «ողջամիտ» ԱԲ-ի ստեղծման համար:

Աշխարհում ամենահարուստ ընկերությունները ներկայում ներդրումներ են կատարում «ուժեղ» ԱԲ-ի զարգացման մեջ: Դրանցից է, օրինակ, Google-ի սեփականատիրոջը պատկանող DeepMind լաբորատորիան: