Հարություն Կիվիրյանը կմեկնի տիեզերք՝ NASA-ի առաքելության շրջանակում

Տիեզերագնաց Հարություն Կիվիրյանն ընդգրկվել է SpaceX-ի Crew-14 առաքելության հիմնական անձնակազմում եւ առաջին անգամ կմեկնի Միջազգային տիեզերակայան։ 

Օդագնացության և տիեզերական տարածության հետազոտությունների ազգային գործակալության (ՆԱՍԱ) տվյալներով՝ մեկնարկը նախատեսված է 2027 թվականի գարնանից ոչ շուտ։ Crew-14-ի քառյակը կգլխավորի ՆԱՍԱ-ի տիեզերագնաց Քայլա Բարոնը, օդաչուն կլինի Քրիս Բիրչը, իսկ առաքելության մասնագետներ՝ Ճապոնիայի JAXA-ի տիեզերագնաց Մակոտո Սուվան եւ Հարություն Կիվիրյանը որպես Ռոսկոսմոսի ներկայացուցիչ։ Տիեզերակայան հասնելուց հետո նրանք կմիանան ՄՏԿ 75/76 արշավախմբերին։

Կիվիրյանի համար սա կլինի առաջին տիեզերական թռիչքը։ ՆԱՍԱ-ն նշում է, որ նա 2010 թվականին ավարտել է Սանկտ Պետերբուրգի Սուվորովյան ռազմական ուսումնարանը, իսկ 2015-ին՝ Բալթյան պետական տեխնիկական համալսարանը՝ ստանալով հրթիռաշինության ինժեների որակավորում։ 2021 թվականին նա ընտրվել է Գագարինի անվան տիեզերագնացների պատրաստման կենտրոնի ջոկատ, իսկ 2023-ից ունի փորձարկող տիեզերագնացի կարգավիճակ։

Crew-14-ի ընթացքում անձնակազմը Միջազգային տիեզերակայանում կիրականացնի գիտական հետազոտություններ եւ կփորձարկի նոր տեխնոլոգիաներ, որոնք նախատեսված են նաեւ Լուսին եւ Մարս ապագա երկարատեւ առաքելություններին նախապատրաստվելու համար։

Կիվիրյանը ծնվել է Մայկոպում եւ հայկական ծագում ունի։ Նրա ընդգրկումը Crew-14-ի կազմում նշանակում է, որ նա իր առաջին տիեզերական թռիչքը կիրականացնի միջազգային անձնակազմի կազմում՝ որպես Ռոսկոսմոսի ներկայացուցիչ։