Հայաստանում օտարերկրյա քաղաքացիների աշխատանքի ընդունման համար գործատուներից հատուկ թույլտվություն կպահանջվի:
ՀՀ կառավարության՝ 2016թ. հունիսի 4-ից ուժի մեջ մտած որոշմամբ սահմանվել է ընթացակարգը, որով գործատուները կարող են դիմել եւ ստանալ համապատասխան թույլտվությունը:
Ինչպես տեղեկացնում են «Նորք» սոցիալական ծառայությունների տեխնոլոգիական եւ իրազեկման կենտրոնից, այն գործատուները, որոնք օտարերկրացի աշխատողներ են ընդունել մինչեւ հունիսի 4-ը, ապա 60 օրվա ընթացքում (հունիսի 4-ից հաշվված) պետք է ՀՀ աշխատանքի եւ սոցիալական հարցերի նախարարության Զբաղվածության պետական գործակալություն հաշվառման ներկայացնեն աշխատանքային պայմանագրերի կրկնօրինակները:
Մնացած դեպքերի համար սահմանված է ներքոնշյալ կարգը.
Գործատուն նախ պետք է դիմի Զբաղվածության պետական գործակալություն՝ համալրելու առկա թափուր աշխատատեղը այնտեղ գրանցված աշխատանք փնտրող ՀՀ քաղաքացիների միջոցով:
Վերջիններիս բացակայության կամ սահմանված պահանջներին չհամապատասխանելու դեպքում միայն գործատուն իրավունք ունի դիմել գործակալությանը՝ կոնկրետ օտարերկրացու համար կոնկրետ աշխատանքի թույլտվություն ստանալու նպատակով:
Գործակալության պետի կողմից թույլտվություն ստանալուց հետո գործատուն տեղեկացնում է այդ մասին տվյալ օտարերկրացուն՝ ՀՀ ժամանելու եւ ժամանակավոր կացության կարգավիճակ ստանալու նպատակով անհրաժեշտ փաստաթղթերը ՀՀ ոստիկանություն ներկայացնելու համար:
Աշխատանքի թույլտվություն ստանալուց հետո մեկամսյա ժամկետում գործատուն օտարերկրացի քաղաքացու հետ կնքում է աշխատանքային պայմանագիր՝ պարտավորվելով թույլտվությամբ սահմանված ժամկետում ապահովել նրան համապատասխան աշխատանքով:
