Երեւան/Մեդիամաքս/. Այսօր Երեւանում անց է կացվում «SAP-ի մուտքը Հայաստան» բիզնես-ֆորումը, որի ընթացքում SAP-ԱՊՀ-ի ներկայացուցիչները հայաստանյան ընկերություններին կներկայացնեն բիզնեսի ավտոմատացման իրենց լուծումները:
Ինչպես հաղորդում է Մեդիամաքս-ը, ներկայացնելով ընկերությունը` ԱՊՀ երկրներում SAP-ի գլխավոր տնօրեն Վլադիսլավ Մարտինովն ասել է, որ SAP-ը համաշխարհային առաջնորդ է հանդիսանում բիզնեսի ավտոմատացման ոլորտում` սպասարկելով ավելի քան 100 հազ. ձեռնարկություններ եւ պետական հաստատություններ աշխարհի 120 երկներում:
Նա տեղեկացրել է, որ ընկերությունը գործում է արդեն 35 տարի եւ ամեն տարի ներդնում է €1 մլրդ բիզնեսի զարգացմանն ուղղված հետազոտական ծրագրերում: Նրա խոսքերով, SAP-ի տեսակարար կշիռը բիզնեսի ավտոմատացման ռուսաստանյան շուկայում գերազանցում է 50%-ը, իսկ համաշխարհային շուկայում գերմանական ընկերության մասնաբաժինը երկու անգամ գերազանցում է նրա հիմնական մրցակցի` ամերիկյան Oracle ընկերության շուկան: «Նշեմ, որ մեր հաշվարկներով, համաշխարհային ՀՆԱ 65%-ը արտադրվում է մեր ապրանքատեսակների հարթության վրա»,- նշել է Վլադիսլավ Մարտինովը:
Նրա խոսքերով, հայաստանյան շուկա գալու մասին որոշում է կայացվել` հաշվի առնելով, որ Հայաստանն ունի IT-հատվածի աճի լավ հեռանկարներ, եւ, միաժամանակ, երկիրն ունի աշխատանքի ցածր կատարողականություն (6-7 անգամ ցածր, քան ԱՄՆ-ում եւ ԵՄ-ում): «Մենք Հայաստանում տեսնում ենք պահանջարկ ընկերությունների աշխատանքի կատարողականության բարձրացման ծառայությունների նկատմամբ եւ պատրաստ ենք աջակցություն ցուցաբերել բիզնես-գործընթացների օպտիմալացման գործում, ինչն արդյունքում կհանգեցնի ընդհանուր առմամբ տնտեսության մրցունակության աճի»,- ասել է SAP-ԱՊՀ-ի գլխավոր տնօրենը:
Հայաստանում SAP գործընկերն է «Շիրակ տեխնոլոգիական ընկերություն» ՍՊԸ-ն:
