ՀԾԿՀ-ն հաստատել է կապի օպերատորների միջեւ SMS եւ MMS հաղորդագրությունների փոխկապակցման վճարների նոր ժամանակացույցը

Երեւան /Մեդիամաքս/. ՀՀ Հանրային ծառայությունները կարգավորող հանձնաժողովը /ՀԾԿՀ/ այսօր հաստատել է “ԱրմենՏել”, VivaCell-MTS եւ Orange Armenia կապի օպերատորների միջեւ SMS եւ MMS հաղորդագրությունների փոխկապակցման վճարների նոր ժամանակացույցը:

Ինչպես հաղորդում է ՄԵԴԻԱՄԱՔՍ-ը, այդ մասին այսօր ՀԾԿՀ նիստում հայտարարել է հանձնաժողովի հեռահաղորդակցության վարչության պետ Գեւորգ Գեւորգյանը:

Նրա խոսքերով, ժամանակացույցն ուժի մեջ է մտնելու 2010թ. հունվարի 1-ից:  Մինչեւ 2011 թվականը նախատեսվում է օպերատորների միջեւ SMS եւ MMS հաղորդագրությունների սակագների համամասնական նվազեցում 9-ից մինչեւ 3 դրամ:

Ներկայումս այդ ծառայության արժեքը 11.3 դրամ է: