Մխիթար Հայրապետյանն այցելել է Quantori ընկերություն

ՀՀ բարձր տեխնոլոգիական արդյունաբերության նախարար Մխիթար Հայրապետյանը այցելել է Quantori ընկերություն, որը մասնագիտացած է կենսագիտության եւ առողջապահության ոլորտներում ծրագրային ապահովման, ալգորիթմների եւ տվյալների մշակման գործում։

Նախարարը, ընկերության փոխնախագահ եւ հայաստանյան գրասենյակի ղեկավար Արտյոմ Խոզյաինովի ուղեկցությամբ, շրջել է գրասենյակում, ծանոթացել ընկերության գործունեության առանձնահատկություններին, աշխատանքային պայմաններին։

Արտյոմ Խոզյաինովը ներկայացրել է «Քվանտորի»-ի գործունեությունը եւ ռազմավարական առաջնահերթությունները՝ ընդգծելով, որ Հայաստանը նպաստավոր միջավայր է տեխնոլոգիական ոլորտում գործունեություն ծավալելու համար։ Քննարկվել է որակյալ կադրերի առկայության կարեւորությունը, ինչը ընկերության առաջնային խնդիրներից է։ Այդ նպատակով ստեղծվել է «Քվանտորի»-ի ակադեմիան, որը մասնագետներ է պատրաստում եւ վերապատրաստում ոլորտի գրեթե բոլոր ուղղություններով՝ բավարարելով ինչպես ընկերության, այնպես էլ ներքին շուկայի պահանջարկը։

Նախարարը կարեւորել է պետություն-մասնավոր համագործակցության դերը եւ վերահաստատել նախարարության հանձնառությունը՝ ստեղծելու բարենպաստ միջավայր տեխնոլոգիական ընկերությունների զարգացման եւ առաջընթացի համար։

Քննարկվել են նաեւ ոլորտի առկա մարտահրավերները, գիտահետազոտական գործունեության ընդլայնման հնարավորությունները, տեխնոլոգիական ոլորտում Հայաստանի դիրքերի ամրապնդմանն ուղղված քայլերը, ինչպես նաեւ առաջացած խնդիրների լուծման ուղիները։

Կողմերը քննարկել են «Բարձր տեխնոլոգիաների ոլորտի պետական աջակցության մասին» օրենքի ընձեռած հնարավորությունները, ոլորտի զարգացման ռազմավարությունը, Ինժեներական քաղաքում գործունեություն ծավալելու առանձնահատկությունները, փոքր եւ միջին բիզնեսի զարգացմանն ուղղված ծրագրերը, ինչպես նաեւ մի շարք այլ հարցեր։

Այցի ընթացքում ձեռք են բերվել կոնկրետ պայմանավորվածություններ, որոնք հնարավորություն կտան խորացնելու համագործակցությունն ու նոր հնարավորություններ ստեղծելու տեխնոլոգիական էկոհամակարգի զարգացման համար։

«Քվանտորի»-ի գրասենյակը Հայաստանում բացվել է 2022 թվականի մարտին։ Ընկերության գործունեությունն ընդգրկում է գիտական ինֆորմատիկայի, լաբորատոր ինֆորմատիկայի, տվյալագիտության (Data Science), բարձր արտադրողականությամբ հաշվարկների (High Performance Computing) եւ արհեստական բանականության (AI) ոլորտները։ «Քվանտորի»-ն գրասենյակներ ունի նաեւ Բոստոնում, Թբիլիսիում եւ Աստանայում։