42 Երեւանը՝ Թումոյի «տրամաբանական շարունակությունը»

Դիանա Բաղդասարյանը 42 Երեւանի ուսանող է ու ծրագրային ապահովման (Software) ինժեների փորձնակություն է անցնում NVIDIA ընկերությունում։ Համալսարանում կրթությանը զուգահեռ նա ընդունվել է 42 Երեւան ու ինչպես ինքն է ասում՝ այն դարձել է իր երկրորդ տունը։ Դիանան iTel.am-ին պատմել է որպես սկսնակ աշխատաշուկայում տեղը գտնելու դժվարությունների, 42 Երեւանի ու NVIDIA-ում աշխատանքի մասին։

Դիանա Բաղդասարյան՝ 42 Երեւանի ուսանող

23 տարեկան եմ, սովորում եմ ԵՊՀ Կիրառական մաթեմատիկայի ֆակուլտետում ու զուգահեռ ընդունվել եմ 42 Երեւան: Այժմ NVIDIA-ում Omniverse-ի թիմում ծրագրային ապահովման (Software) ինժեների ինտերնշիփ եմ անցնում։

2020-ին, երբ դեռ 2-րդ կուրսում էի սովորում, զգացի, որ միայն համալսարանի կրթությունը քիչ է ու ավելի գործնական դասընթացների կարիք ունեմ։ Չեմ թերագնահատում համալսարանի կրթությունը, պարզապես տեսական գիտելիքները կիրառելու անհրաժեշտություն ունեի։

Դիանա Բաղդասարյանը
photo © Մեդիամաքս

42 Երեւան դիմելը երկար հետաձգում էի, վստահ չէի, որ կհավանեմ։ Ընդունելության վերջին օրն եմ դիմել։ Ինձ համար շատ դժվար էր սկզբում, քանի որ ինտրովերտ եմ ու դժվար էր շփվելը։ Երբ ինչ-որ բան չէր ստացվում՝ պարփակվում էի իմ մեջ ու մեղադրում ինքս ինձ, չէի կարողանում օգնության դիմել։

Հետո այստեղ ընկերներ ձեռք բերեցի ու վախս անցավ, միասին փորձում էինք հաղթահարել բարդ խնդիրները։ Հոգեբանական առումով 42 Երեւանը շատ բան է իմ մեջ փոխել․փափուկ հմտությունները, որ այստեղ եմ ձեռք բերել, ինձ այսօր շատ են օգնում աշխատավայրում։ 42 Երեւանը մեծ դեր է խաղացել նրանում, որ ես հենց այսպիսի մարդ դառնամ՝ ավելի համարձակ ու ինքնավստահ։

Դասապրոցեսն ու նախագծերը

Դասերը երկու շրջափուլով են անցկացվում՝ ներքին եւ արտաքին։ Հիմա արտաքին շրջափուլում եմ։ Ֆորմատը հիմնված է ինքնակրթության վրա՝ կան հատուկ նյութեր, որոնք պետք է յուրացնել, այնուհետեւ ձեռք բերած գիտելիքը կիրառել իրական նախագծերի վրա։ Սա ինձ առավել ինքնավստահ է դարձրել ու հիմա գիտեմ, եթե ինչ-որ նախագիծ ինձ վստահեն՝ կկարողանամ «տակից դուրս գալ», չեմ վախենա պատասխանատվություն վերցնելուց։

Հնարավոր է համատեղել համալսարանի դասերի հետ, ճկուն է գրաֆիկը, շենքը 24 ժամ բաց է ու հնարավոր է ցանկացած ժամի գալ ու աշխատել։

Ամեն ուրբաթ ընթացիկ քննություններ ենք հանձում, որոնք հինված են այն նյութերի ու առաջադրանքների վրա, որոնց վրա աշխատում ենք։ Երկրորդ փուլում արդեն ընտրում ենք մեզ հետաքրքրող նախագծեր ու կենտրոնանում դրանց վրա՝ կայքերի ու խաղերի ստեղծումից մինչեւ համակարգերի մշակում։ Հնարավոր է միանգամից մի քանի ուղղություն ընտրել։ Այս փուլում հավաստագիր ստանալու համար կարեւոր է ինտերնշիփ անելը։

NVIDIA-ում աշխատանքը

Սկսնակներս բազմաթիվ դժվարությունների ենք բախվում նոր աշխատանք փնտրելիս։ Հարկավոր է անդադար փորձել, կատարելագործվել՝ մինչեւ կստացվի։ Այնքան շատ հարցազրույցների էի գնացել, որ, կարելի է ասել, արդեն անգիր էի արել բոլոր հնարավոր հարցերը։

Դիանա Բաղդասարյանը
photo © Մեդիամաքս

Մոտ մեկ ու կես տարի աշխատանք էի փնտրում ու չէի կարողանում գտնել։ Նախքան NVIDIA-ն՝ Zoomerang-ում էի ինտերնշիփ անցնում, սակայն ոլորտային առումով ինձ հոգեհարազատ չէր ու դուրս եկա։ 42 Երեւանը համագործակցում է Zoomerang-ի ու այլ ՏՏ ընկերությունների հետ եւ մեզ համար հաստիքներ էին բացել։ NVIDIA ընդունվելս պատահական է ստացվել, ընկերներիցս մեկն էր ինձ ուղարկել հայտարարությունը, դիմեցի ու բարդ փուլերից հետո անցա։

Էդիկ Հարությունյան՝ 42 Երեւանի գործառնությունների ղեկավար

42 Երեւանը մեծ ցանց մաս է՝ ներկա պահին 50-ից ավել դպրոց կա 30-ից ավելի երկրում։ Ուսանողներն իրենց գլոբալ ու մեծ համայնքի մաս են զգում։

Այն ստեղծվել է 2013-ին Փարիզում, 2020 թվականից արդեն սկսել է գործել նաեւ Երեւանում։ Կենտրոնը, Եվրոպական միության կողմից ֆինանսավորվող Թումոյի նախագծերից մեկի` Թումո լաբորատորիաների, մաս է կազմում։

Էդիկ Հարությունյանը
photo © Մեդիամաքս

Ինքս Թումոյի ուսանող եմ եղել ու իմ երազանքն էր աշխատել հենց Թումոյում, լինել այս միջավայրում ու չկտրվել համայնքից։ Երբ տեղեկացա, որ 42-ը գալիս է Երեւան, իմ նպատակը դարձավ այստեղ աշխատանքի ընդունվել։ Նախագծերի ղեկավարի հիմնական աշխատանքս թողեցի ու եկա՝ սկսելով ինտերնի կարգավիճակից։

Տարիների ընթացքում արդեն հասել եմ գործառնությունների ղեկավարի դերին։

Կրթական մոդելն ու RNCP հավաստագիրը

42 Երեւանի կրթական մոդելը հիմնված է ընկերն ընկերոջը (peer to peer) ուսուցման գաղափարի վրա։ Չկան դասախոսներ, ուսուցիչներ, ամեն ինչ հիմնված է մեկը մյուսին օգնելու վրա։ Նախագծերը ստուգում են հենց ընկերները։

Ամեն նախագծի համար կա տեղեկատվական ֆայլ, որտեղ նկարագրված է ամբողջ նախագծի էությունը, որին միացնելով հետազոտության կտորը ուսանողներն ամբողջությամբ կարող են իրականացնել նախագծերը։ Անհրաժեշտ տեղեկությունը գտնելու հմտությունը նույնպես զարգանում է։ Ուսանողների մոտ 30 տոկոսն է կարողանում հաղթահարել ավազանի մեկ ամսյա փուլը։ Պետք է ժամանակ ու մեծ կենտրոնացում տրամադրել։

Էդիկ Հարությունյանը
photo © Մեդիամաքս

Ներքին փուլում ուսանողները ստանում են բազային գիտելիքներ ու հիմք, իսկ արտաքինում՝ ընտրում են մասնագիտացման ուղղություն, որով շարունակելու են ուսումը։ Այնուհետեւ, ինտերնշիփ անցնելուց հետո կարող են ստանալ RNCP սերտիֆիկատ, որը միջազգայնորեն ընդունված ֆրանսիական հավաստագիր է։

Այստեղ կազմակերպում ենք ՏՏ ընկերությունների ներկայացուցիչների հետ հանդիպումներ։ Նրանք ներկայացնում են իրենց ծրագրերը, պրոդուկտներն ու ազատ հաստիքները, աշխատանքային հնարավորությունները։ ՏՏ ընկերությունների հետ ուղիղ կապը փորձում ենք պահել, որպեսզի ուսանողները կապը չկորցնեն աշխատաշուկայի հետ։

Ընդունելությունը

42 Երեւան կարող են դիմել 18 տարեկան եւ բարձր տարիքի անձինք։ Հաճախ սիրում եմ ասել, որ սա Թումոյի տրամաբանական շարունակությունն է։ Կարեւոր է, որ դպրոցը 24 ժամ բաց է, կրթությունն անվճար է։

Ավազաններն անցկացվում են ամեն տարի։ Նախորդ տարի 2 անգամ ենք ընդունելություն արել, այս տարի նախատեսում ենք երեք ավազան՝ սեպտեմբերից դեկտեմբեր։ Ընդունելությունը հիմա բաց է։ Կարող են դիմել մեր պաշտոնական կայքում՝ պարզապես տրամաբանական խաղեր խաղալով։  

Նունե Գրիգորյան

Լուսանկարները՝ Էմին Արիստակեսյանի