«Հայկական վիրտուալ կամուրջ»-ն ընդունում է մասնակցության հայտեր

ՀՀ բարձր տեխնոլոգիական արդյունաբերության նախարարության եւ ՀԲԸՄ Սիլիկոնյան հովտի մասնաճյուղի նախաձեռնությամբ իրականացվող «Հայկական վիրտուալ կամուրջ» ծրագրի հայտերի ընդունման գործընթացը շարունակվում է:

Դիմումներն ընդունվում են այստեղ՝ մինչեւ օգոստոսի 23-ը ներառյալ:
 
Աքսելերացիոն դասընթացների առաջին փուլով մասնակցելու հնարավորություն են ստանալու 15 հայկական հաջողակ ընկերություններ, որոնք կունենան մշակված պրոդուկտի նախատիպ կամ արդեն իսկ գործարկված պրոդուկտ կամ ծառայություն:

Մասնակիցների համար Սիլիկոնյան հովտի առաջատար մասնագետներն ու ներդրումային ընկերությունների ղեկավարները, աշխարհի լավագույն համալսարանների դասախոսներն ու ամենահայտնի ընկերությունների հիմնադիրները գործնական դասեր կանցկացնեն՝ տրամադրելով մասնագիտական խորհրդատվություն ամբողջ դասընթացի գործընթացում:

Աքսելերացիոն ծրագրի նպատակն է հայ ձեռնարկատերերին տրամադրել անհրաժեշտ գիտելիքներ ու գործիքակազմ՝ միջազգային շուկաներ մուտք գործելու, Սիլիկոնյան հովտում բիզնեսի զարգացման հնարավորություններ ձեւավորելու նպատակով:

8 շաբաթ տեւողությամբ առցանց դասընթացների ընթացքում քննարկվելու են հայ ձեռնարկատերերի համար խորքային կարեւորություն ունեցող թեմաները՝

-    Տեխնիկական նորարարություն (Technical innovation), որը ներառում է արհեստական բանականության, տվյալագիտության, իրերի ինտերնետի (Internet of Things) եւ այլ  ոլորտներում վերջին թրենդների ուսումնասիրություն,
-    Բիզնեսի զարգացում (Business Development), որի շրջանակներում ներկայացվելու են շուկայի ուսումնասիրությունները, վաճառքների կազմակերպումը եւ մարքեթինգը, ֆինանսական, իրավական եւ  գործարարներին անհրաժեշտ այլ հարակից թեմաներ,
-    Հաղորդակցման հմտություններ (Soft Skills)՝ խորքային գիտելիքներ են տրամադրվելու թիմային աշխատանք, առաջնորդության, ներկայացման եւ այլ հմտությունների վերաբերյալ:

Աքսելերացիոն ծրագրի շրջանակներում մասնակիցներից յուրաքանչյուրն աշխատելու է իր մենթորի հետ՝ հնարավորություն ունենալով առցանց հանդիպելու եւ հետաքրքրող հարցերը քննարկելու: Ծրագրի ավարտին ավիաթռիչքների վերականգնումից հետո հայ մասնակիցները Սիլիկոնյան հովիտ մեկնելու եւ ներդրողներին իրենց գործարար գաղափարները ներկայացնելու, եւ տեղում ներդրումներ ներգրավելու հնարավորություն են ստանալու:

Ծրագրին կարող են դիմել ընկերությունները, որոնք՝

-     Գրանցված են Հայաստանի Հանրապետությունում,
-    Գրանցված են ICTStat համակարգում (ictstat.am),
-    Ունեն պրոդուկտի նախատիպ կամ արդեն իսկ գործարկված պրոդուկտ կամ ծառայություն,
-    Ներկայացնող անձինք ՀՀ քաղաքացի են, ունեն անգլերենի իմացության բարձր մակարդակ, հանդիսանում են ընկերության հիմնադիր կամ ղեկավար կազմից են:

Հիշեցնենք, որ «Հայկական վիրտուալ կամուրջ» ծրագրի աքսելերացիոն փուլի մեկնարկը տրվել է օգոստոսի 3-ին՝ առցանց հանդիպման ժամանակ: